ನಕ್ಸಲ್‌ವಾದದ ಕುರಿತು ಚರ್ಚೆ ನಡೆಸುವಾಗಲೆಲ್ಲಾ ಒಂದು ಪ್ರಶ್ನೆ ಆಗಾಗ್ಗೆ ತೂರಿ ಬರುತ್ತಿರುತ್ತದೆ . ನಕ್ಸಲ್‌ವಾದವನ್ನು ವ್ಯಾಖ್ಯಾನಿಸುವುದಾದರೂ ಹೇಗೆ ? ಅದೇನು ಸಾಮಾಜಿಕ ಸಮಸ್ಯೆಯೋ ಅಥವಾ ಕೇವಲ ' ಕಾನೂನು ಹಾಗೂ ಸುವ್ಯವಸ್ಥೆ ' ಗೆ ಸಂಬಂಧಿಸಿದ ಸಮಸ್ಯೆಯೋ ? ಈ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳುವ ಮೊದಲು ಈಗ ಎಲ್ಲೆಡೆ ವ್ಯಾಪಕವಾಗಿ ಬಳಕೆಯಾಗುತ್ತಿರುವ ' ಕಾನೂನು ಹಾಗೂ ಸುವ್ಯವಸ್ಥೆ ' ಎಂಬ ಶಬ್ದಗಳನ್ನು ಸರಿಯಾಗಿ ಅರಿತುಕೊಳ್ಳದ ಹೊರತು ಸೂಕ್ತ ಉತ್ತರ ಕಂಡುಕೊಳ್ಳುವುದು ಅಸಾಧ್ಯ . ' ಕಾನೂನು ಹಾಗೂ ಸುವ್ಯವಸ್ಥೆ ' ಎಂಬ ಶಬ್ದಗಳನ್ನು ಬಳಸಿದಾಗ ಅದು ತನ್ನೊಡನೆ ಅದನ್ನು ಬಳಸುತ್ತಿರುವ ವ್ಯಕ್ತಿಗಳ ಸಾಮಾಜಿಕ ಹಾಗೂ ರಾಜಕೀಯ ಸ್ಥಾನಮಾನಗಳನ್ನೂ ಹೊತ್ತು ತರುತ್ತದೆ . ಹಾಗಾದರೆ ನಮ್ಮಲ್ಲೀಗ ' ಕಾನೂನು ಹಾಗೂ ಸುವ್ಯವಸ್ಥೆ ' ಯ ಪರಿಭಾಷೆಯನ್ನು ಬಳಸುತ್ತಿರುವವರಾದರೂ ಯಾರು ? ಕೋರ್ಟ್‌ಗಳಲ್ಲಿ , ಪೊಲೀಸ್ ಠಾಣೆಗಳಲ್ಲಿ , ಅಧಿಕಾರಶಾಹಿಯ ದರ್ಬಾರ್‌ನಲ್ಲಿ ಹಾಗೂ ಸ್ವಲ್ಪ ಮಟ್ಟಿಗೆ , ಮಧ್ಯಮ ವರ್ಗದ ಚಾವಡಿಗಳಲ್ಲಿ ಈ ಪದಗಳ ಬಳಕೆ ವ್ಯಾಪಕವಾಗಿ ಆಗುತ್ತಿರುತ್ತದೆ . ಅದರಲ್ಲೂ ಅಸಮಾನತೆಯ ಬುನಾದಿಯ ಮೇಲೆಯೇ ತನ್ನ ಸುಖದ ಸೌಧ ಕಟ್ಟಿಕೊಂಡಿರುವ ನಮ್ಮ ಇಂದಿನ ಸಮಾಜದಲ್ಲಿ ಸ್ಥಾಪಿತ ಶಕ್ತಿಗಳ ಹಿತಾಸಕ್ತಿಗಳ ರಕ್ಷಣೆಗೇ ಇಂಥ ಪದಗಳು ಹೆಚ್ಚು ಬಳಕೆಯಾಗುವುದಿದೆ . ಇಂಥ ಪ್ರಶ್ನೆಗಳ ಜಾಡನ್ನು ಅರಸುತ್ತಾ ಹೊರಟರೆ ' ಕಾನೂನು ಹಾಗೂ ಸುವ್ಯವಸ್ಥೆ ' ಎಂಬುದು ನಮ್ಮ ಸಮಾಜದ ಮನಸ್ಥಿತಿಯಲ್ಲಿಯೇ ಅಂತರ್ಗತವಾಗಿರುವ ಒಂದು ಬಗೆಯ ' ಶ್ರೇಣಿ ವ್ಯವಸ್ಥೆ ' ಯ ಪ್ರಾತಿನಿಧಿಕ ಶಬ್ದಗಳೆಂಬಂತೆ ಭಾಸವಾಗುತ್ತದೆ . ಅಷ್ಟಕ್ಕೂ ನಾವು ' ಕಾನೂನು ಹಾಗೂ ಸುವ್ಯವಸ್ಥೆ ' ಎಂಬ ಶಬ್ದಗಳನ್ನು ' ನ್ಯಾಯ ಹಾಗೂ ಸಮಾನತೆ ' ಎಂಬರ್ಥದಲ್ಲಿ ಅರ್ಥೈಸಿಕೊಳ್ಳುವ ಮಟ್ಟಿಗಾದರೂ ವಾತಾವರಣವನ್ನು ಹದಗೊಳಿಸಿದ್ದೇವೆಯೇ ? ' ಕಾನೂನು ಹಾಗೂ ಸುವ್ಯವಸ್ಥೆ ' ಎಂಬ ಶಬ್ದಗಳನ್ನು ' ಸಾಮಾಜಿಕ ನ್ಯಾಯ ಹಾಗೂ ಸಮಾನತೆ ' ಎಂದು ಅರ್ಥೈಸಿಕೊಳ್ಳುವುದರಲ್ಲಿ ವಿಫಲವಾದ ಕ್ಷಣದಲ್ಲಿಯೇ ನಾವು " ನಕ್ಸಲ್‌ವಾದ ಒಂದು ಯಃಕಶ್ಚಿತ್ ಕಾನೂನು ಸುವ್ಯವಸ್ಥೆಗೆ ಸಂಬಂಧಿಸಿದ ಸಮಸ್ಯೆ " ಎಂದು ತೀರ್ಪು ನೀಡುವ ನೈತಿಕ ಹಕ್ಕನ್ನೂ ಕಳೆದುಕೊಳ್ಳುತ್ತೇವೆ .

ನನ್ನ ಪ್ರಕಾರ ' ನಕ್ಸಲ್‌ವಾದ ' ನಮ್ಮ ವ್ಯವಸ್ಥೆಯ ಸಂವೈಧಾನಿಕ ಹಾಗೂ ನ್ಯಾಯ ವ್ಯವಸ್ಥೆಯ ಸೋಲಿನ ಫಲ . ಸಮಾಜದ ಮುಖ್ಯವಾಹಿನಿಯಿಂದ ಹೊರತಾಗಿ ಧ್ವನಿ ಕಳೆದುಕೊಂಡ ಹತಾಶೆಯಲ್ಲಿ ಬದುಕುವ ಜನಸಾಮಾನ್ಯರ ಆಶೋತ್ತರಗಳನ್ನು ಹಾಗೂ ಅವರ ಸಂವೈಧಾನಿಕ ಅವಶ್ಯಕತೆಗಳನ್ನು ಈಡೇರಿಸುವಲ್ಲಿ ವಿಫಲವಾಗುವ ವ್ಯವಸ್ಥೆಯೊಂದರ ಕೂಸು ಈ ' ನಕ್ಸಲ್‌ವಾದ '. ಇದನ್ನು ಕೆಲವೊಮ್ಮೆ ' ಪಿಡುಗು ' ಎಂದು ಕರೆಯುತ್ತಾರಾದರೂ ಅದನ್ನು ಸಾಮಾಜಿಕವಾಗಿ ಪರಿತ್ಯಕ್ತವಾದ ಸಮುದಾಯವೊಂದರ ಹತಾಶ ಅಭಿವ್ಯಕ್ತಿ ಎಂದು ಅರ್ಥೈಸಿಕೊಳ್ಳಲು ನಾನು ಬಯಸುತ್ತೇನೆ . ಅಂದರೆ ಸಂವಿಧಾನ ಒದಗಿಸುವ ಮೂಲಭೂತ ಹಕ್ಕುಗಳಿಂದ ವಂಚಿತವಾದ ಮುಗ್ಧ ಸಮುದಾಯವೊಂದು ತನ್ನ ಅಳಲಿನ ಅಭಿವ್ಯಕ್ತಿಗೆ ಶಸ್ತ್ರದ ಮೊರೆ ಹೋಗುವ ಸನ್ನಿವೇಶವನ್ನು ನಾವೇ ಸೃಷ್ಟಿಸಿದ್ದೇವೆ . ನಮ್ಮ ವರ್ತಮಾನಕ್ಕೆ ಎಂಥ ಕ್ರ್ರೌರ್ಯವನ್ನು ಆರೋಪಿಸಿದ್ದೇವೆಂದರೆ ನಮ್ಮದೇ ಸಮಾಜದ ಕೆಲವು ಸಮುದಾಯಗಳಿಗೆ ಹಿಂಸೆಯನ್ನು ಅವಲಂಭಿಸುವುದಲ್ಲದೇ ಬೇರೆ ಆಯ್ಕೆಗಳೇ ಇಲ್ಲದಂತಾಗಿ ಹೋಗಿದೆ . ಹಾಗೆಂದ ಮಾತ್ರಕ್ಕೆ , ಸಮಾಜದಲ್ಲಿ ವ್ಯಾಪಕವಾಗುತ್ತಿರುವ ಅಸಮಾನತೆಯನ್ನು ಹೋಗಲಾಡಿಸಲು ನಕ್ಸಲ್‌ವಾದದಂಥ ಪ್ರತಿಗಾಮಿ ಹೆಜ್ಜೆ ಅನಿವಾರ್ಯವೇ ? ಖಂಡಿತ ಅಲ್ಲ .

ರಕ್ತಕ್ರಾಂತಿ ಮಾಡುವ ಮೂಲಕ ತಮ್ಮ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಬಹುದು ಎಂದು ಯಾರಾದರೂ ಭಾವಿಸಿದ್ದರೆ ಅದು ಅವರ ಮೂರ್ಖತನವಷ್ಟೇ . ರಕ್ತ ಹಾಗೂ ಮಾಂಸದ ಬುನಾದಿಯ ಮೇಲೆ ಸುಖಿ ಸಾಮ್ರಾಜ್ಯ ಕಟ್ಟಲು ಸಾಧ್ಯವೇ ಇಲ್ಲ . ಹಿಂಸೆಯನ್ನು ಬಳಸಿಕೊಂಡು ಸ್ಥಾಪನೆಯಾದ ಸಾಮ್ರಾಜ್ಯಕ್ಕೆ ಹಿಂಸೆಯನ್ನೇ ಸೇವಿಸಿ ಬದುಕುವ ಅನಿವಾರ್ಯತೆ ಇರುತ್ತದೆ . ಆಳುವ ವರ್ಗದ ನಿಷ್ಕರುಣೆ ಹಾಗೂ ಅಮಾನವೀಯತೆಯ ಫಲವಾಗಿಯೇ ನಕ್ಸಲ್‌ವಾದ ಸೃಷ್ಟಿಯಾಗಿದೆ ಎಂಬುದನ್ನು ಒಪ್ಪಿಕೊಂಡಂತೆ ನಕ್ಸಲ್‌ವಾದ ಅಪ್ಪಿಕೊಂಡಿರುವ ಹಿಂಸೆಯನ್ನೂ ವಿರೋಧಿಸುವ ಸಮಚಿತ್ತತೆ ನಮ್ಮದಾಗಿರಬೇಕು . ನಕ್ಸಲರ ಇಂಥ ರಕ್ತದಾಹಿ ಕ್ರಾಂತಿ ಮತ್ತೊಂದು ರಕ್ತದಾಹಿ ಸಾಮ್ರಾಜ್ಯವನ್ನು ನಿರ್ಮಾಣ ಮಾಡುತ್ತದೆಯಷ್ಟೇ . ಬೇಕಾದರೆ ಜಗತ್ತಿನ ಇತಿಹಾಸದಲ್ಲಿ ಆಗಿ ಹೋದ ರಷ್ಯನ್ ಕ್ರಾಂತಿ , ಚೀನಾ ಕ್ರಾಂತಿಗಳ ಪುಟಗಳನ್ನೊಮ್ಮೆ ತಿರುವಿ ಹಾಕಿ ಕೈಗೆ ನೆತ್ತರು ಅಂಟಿಕೊಳ್ಳದಿದ್ದರೆ ಕೇಳಿ .

ಆಳುವ ವರ್ಗದ ಹಿಂಸಾಚಾರವನ್ನು ತಹಬದಿಗೆ ತರದೇ ನಕ್ಸಲ್ ರೀತಿಯ ಪ್ರತಿಗಾಮಿತನವನ್ನು ಮಟ್ಟ ಹಾಕುವುದು ಅಸಾಧ್ಯ . ನಕ್ಸಲ್‌ವಾದದ ಹುಟ್ಟಿಗೆ ಆಳುವ ವರ್ಗದ ಹಿಂಸಾಚಾರ ಎಷ್ಟು ಮಹತ್ವದ ಕೊಡುಗೆ ಸಲ್ಲಿಸಿದೆಯೋ ಮಧ್ಯಮ ವರ್ಗದ ಸೋಗಲಾಡಿತನ ಕೂಡ ಅಷ್ಟೇ ಕೊಡುಗೆ ಸಲ್ಲಿಸಿದೆ . ಸಮಾಜದ ಇನ್ನಿತರ ವರ್ಗಗಳ ಬಲಿಕೊಟ್ಟು ತನ್ನ ಸುಖ ಕಂಡುಕೊಳ್ಳುವ ಮಧ್ಯಮ ವರ್ಗ ಇನ್ನಾದರೂ ಎಚ್ಚೆತ್ತುಕೊಳ್ಳಬೇಕಿದೆ . ಕೇವಲ ನಕ್ಸಲರನ್ನು ದೂರಿದರೆ ಸಮಸ್ಯೆಗೆ ಪರಿಹಾರ ದೊರೆಯುವುದಿಲ್ಲ . ನಮ್ಮದೇ ನಡುವಿನ ವ್ಯಕ್ತಿಗಳು ನಕ್ಸಲರಾಗಿ ಬಂದೂಕು ಹಿಡಿಯುತ್ತಾರೆಂದರೆ ಅದಕ್ಕೆ ಪ್ರೇರಣೆಯಾಗುವ ಸಾಮಾಜಿಕ ಕಾರಣಗಳನ್ನು ಅರ್ಥ ಮಾಡಿಕೊಳ್ಳುವ ವ್ಯವಧಾನವನ್ನು ಒಂದು ಸಮಾಜವಾಗಿ ನಾವು ಬೆಳೆಸಿಕೊಳ್ಳಬೇಕಿದೆ . ಬಂದೂಕು ಹಿಡಿದು ಕಾಡಿಗೆ ನಡೆದು ಹೋಗುವ ಆ ಹುಡುಗರ ಮನದ ತುಮುಲಗಳನ್ನು ಅರ್ಥ ಮಾಡಿಕೊಳ್ಳಲು ನಾವೆಂದಾದರೂ ಪ್ರಯತ್ನಿಸಿದ್ದೇವೆಯೇ ? ಅಥವಾ ನಕ್ಸಲರನ್ನು ದೂರುವಷ್ಟೇ ಆಸ್ಥೆಯಿಂದ ಸಕಲ ಸಮುದಾಯವನ್ನೂ ಒಳಗೊಳ್ಳುವ ರಾಜಕೀಯ ಪರ್ಯಾಯವೊಂದನ್ನು ಹುಟ್ಟುಹಾಕಲು ಮುಂದಾಗಿದ್ದೇವೆಯೇ ? ಆ ' ಲೋಕನಿಂದಿತ ' ರ ನೋವಿಗೆ ಮಿಡಿಯುವ ಬದಲು ಅವರ ನಿರ್ಧಾರವನ್ನು ಟೀಕಿಸುತ್ತಾ ಕೂರುವುದರಲ್ಲಿ ಯಾವ ಪುರಷಾರ್ಥ ಸಾಧನೆಯಾಗುತ್ತದೆ ? ನಕ್ಸಲ್‌ವಾದವನ್ನು ಕ್ಯಾನ್ಸ್‌ರ್ ಎಂದಾದರೂ ಕರೆಯಿರಿ , ರೇಬಿಸ್ ಎಂದಾದರೂ ಕರೆಯಿರಿ . ಹಾಗೆಂದು ಕರೆದ ಮಾತ್ರಕ್ಕೆ ' ಕ್ಯಾನ್ಸರ್ ' ಗೆ ಕಾರಣವಾಗುವ ಸಾಮಾಜಿಕ ಸನ್ನಿವೇಶಗಳಿಗೆ ಮದ್ದು ಹುಡುಕಿದಂತಾದೀತೇ ?

ಸೈನಿಕರನ್ನು , ಬಂದೂಕುಗಳನ್ನು ಬಳಸಿಕೊಂಡು ನಕ್ಸಲ್‌ವಾದಕ್ಕೆ ಉತ್ತರ ಹುಡುಕುತ್ತಿರುವ ಪಿ . ಚಿದಂಬರಂ ಅವರಿಗೆ ಇತಿಹಾಸ ಪ್ರಜ್ಞೆ ಇದ್ದಂತಿಲ್ಲ . ತೆಲಂಗಾಣದಂಥ ಸಮಸ್ಯೆಗೆ ರಾತ್ರೋ ರಾತ್ರಿ ನಿದ್ದೆಗೆಟ್ಟು ಪರಿಹಾರ ಕಂಡು ಹಿಡಿಯುವಾಗ ಇರುವ ವ್ಯವಧಾನ ಇದೇ ರಾಜಕಾರಣಿಗಳಿಗೆ ನಕ್ಸಲ್‌ವಾದದ ಕುರಿತು ವಿಚಾರ ಮಾಡುವಾಗ ಇರುವುದಿಲ್ಲ . ಮನುಷ್ಯನ ಇತಿಹಾಸವನ್ನೊಮ್ಮೆ ನೋಡಿ ಸೈನಿಕರು , ಬಂದೂಕುಗಳಿಂದ ಒಂದೇ ಒಂದು ಸಭ್ಯ ಸಂಸ್ಕೃತಿಯೂ ಈವರೆಗೆ ಜನ್ಮ ತಳೆದಿಲ್ಲ . ' ಆಪರೇಷನ್ ಗ್ರೀನ್ ಹಂಟ್ ' ಹೆಸರಿನಲ್ಲಿ ಮುಗ್ಧ ಬುಡಕಟ್ಟು ಸಮುದಾಯಗಳನ್ನು ಅವುಗಳ ಸಾಂಸ್ಕೃತಿಕ ಬೇರುಗಳ ಸಮೇತ ನಾಶಗೊಳಿಸಲಾಗುತ್ತಿದೆ . ಇಂಥ ಚಿದಂಬರಂ ರೀತಿಯ ಮನಸ್ಥಿತಿಯ ವ್ಯಕ್ತಿಗಳಿಂದಾಗಿಯೇ ಈಶಾನ್ಯ ಭಾರತ ಇಂದು ರಕ್ತ ಸಿಕ್ತವಾಗಿದೆ . ಬಂದೂಕು , ಬಾಂಬ್‌ಗಳಿಂದ ಅವರೇನು ಮಿಲಿಟರಿ ರಾಜ್ಯವನ್ನು ಕಟ್ಟಬೇಕೆಂದಿದ್ದಾರೆಯೇ ? ಕಟ್ಟುವ ಇರಾದೆ ಅವರಿಗಿರಬಹುದೇನೋ . ಆದರೆ ನಮಗೆ ಬೇಕಿರುವುದು ಪ್ರಜಾಪ್ರಭುತ್ವವಾದಿ ರಾಜ್ಯ . ಆರೋಗ್ಯವಂತ ಮನಸ್ಥಿತಿಯ ಪ್ರತಿಯೊಬ್ಬ ವ್ಯಕ್ತಿಯ ಕಾಳಜಿಯೂ ಅದೇ .

ಟಿಎಸ್‌ಐ

ನಿರೂಪಣೆ : ಕೆ . ಆರ್ . ಅರುಣ ಕುಮಾರ