ಕೈ ಜೋಡಿಸಬೇಕು

'ಭವಿಷ್ಯದಲ್ಲಿ ಇಂತಹ ನಾಚಿಕೆಗೇಡಿನ ಪ್ರಸಂಗ ತಡೆಯಲು ಪರಸ್ಪರ ಕೈಜೋಡಿಸುವ ಎದೆಗಾರಿಕೆ ಕಾಂಗ್ರೆಸ್- ಬಿಜೆಪಿಗೆ ಇದೆಯೇ?' ಮುಖಪುಟ ಲೇಖನ (ಅರಿಂದಮ್ ಚೌಧುರಿ) ಭಾರತದಲ್ಲಿ ಹೊಸ ರಾಜಕೀಯ ಚಿಂತನೆಗೆ ನಾಂದಿಯಾಗುವುದರಲ್ಲಿ ಸಂಶಯವಿಲ್ಲ. ಕಾಂಗ್ರೆಸ್- ಬಿಜೆಪಿ ಹೊರತುಪಡಿಸಿ ಯಾವುದೇ ಪ್ರಾದೇಶಿಕ ಪಕ್ಷಕ್ಕೂ ರಾಷ್ಟ್ರೀಯ ದೂರದರ್ಶಿತ್ವ ಇಲ್ಲ ಎಂಬುದು ವಿಶ್ವಾಸಮತ ಯಾಚನೆಯ ಸಂದರ್ಭ ಬಯಲಾಗಿದೆ. ಸದ್ಯದ ರಾಜಕೀಯ ಪರಿಸ್ಥಿತಿಯನ್ನು ನೋಡಿದರೆ ಜಾತಿಯಾಧಾರಿತ ರಾಜಕೀಯ ಭಾರತದ ದೊಡ್ಡ ಸಮಸ್ಯೆ. ಎಷ್ಟೋ ವೇಳೆ ಈ 'ವಿಭಜನೆ'ಗಳು ಕಲಹಗಳಿಗೂ ದಾರಿ ಮಾಡಿಕೊಟ್ಟಿವೆ. ಸದ್ಯಕ್ಕೆ ಭಾರತದಲ್ಲಿನ ಎರಡು ಅತೀ ದೊಡ್ಡ ಪಕ್ಷಗಳಾದ ಕಾಂಗ್ರೆಸ್ ಮತ್ತು ಬಿಜೆಪಿಯಲ್ಲಿ ದೇಶವನ್ನು ಆರ್ಥಿಕವಾಗಿ ಸದೃಡಗೊಳಿಸಬಲ್ಲ ಸಮರ್ಥ ನಾಯಕರಿದ್ದಾರೆ. ಎರಡು ಕೈ ಸೇರಿದರೆ ಚಪ್ಪಾಳೆ ಎಂಬಂತೆ ಈ 2 ಪಕ್ಷಗಳು ಕೈ ಜೋಡಿಸಿದರೆ ಬೆರಳೆಣಿಕೆಯಷ್ಟೂ ಇಲ್ಲದ ಸಂಸದರನ್ನಿಟ್ಟುಕೊಂಡು 'ಕಿಂಗ್‌ಮೇಕರ್' ಆಗ ಬಯಸುವ ಚಿಕ್ಕ ಪಕ್ಷಗಳನ್ನು ದೂರವಿಡಬಹುದು. ಆ ಮೂಲಕ ಅಂತರ್ ರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಸ್ಥಾನ-ಮಾನ ಸುಧಾರಿಸಬಹುದು. ಎರಡೂ ಪಕ್ಷಗಳು ದೇಶದ ಹಿತದೃಷ್ಟಿಯನ್ನು ಗಮನದಲ್ಲಿಟ್ಟುಕೊಂಡು ಈ ಬಗ್ಗೆ ಚಿಂತಿಸಬೇಕು ಅಷ್ಟೇ...

ಇರ್ಷಾದ್ ಎಂ. ವೇಣೂರು
ಉಜಿರೆ

ಲಜ್ಜೆಗೆಟ್ಟ ರಾಜಕೀಯ

ನಾಚಿಕೆಗೇಡಿನ ರಾಜಕೀಯ ನಾಟಕಗಳನ್ನು ತಡೆಯಲು ನಮ್ಮ ದೇಶದ ದೊಡ್ಡ ಪಕ್ಷಗಳಾದ ಕಾಂಗ್ರೆಸ್- ಬಿಜೆಪಿ ಕೈ ಜೋಡಿಸಬೇಕೆಂಬ ವಿಷಯವನ್ನು ಹೊತ್ತು ತಂದ ಮುಖಪುಟ ಲೇಖನ ವಿಶೇಷವಾಗಿತ್ತು. ಏರುತ್ತಿರುವ ಹಣದುಬ್ಬರ, ರೈತರ ಸಂಕಷ್ಟಗಳನ್ನು ಪರಿಹರಿಸಲು ಸಾಧ್ಯವಾದ ಪಕ್ಷಗಳು ನಮ್ಮಲ್ಲಿಲ್ಲ. ಯಾವೊಬ್ಬ ರಾಜಕಾರಣಿಯೂ ದೇಶದ ಉದ್ಧಾರಕ್ಕಾಗಿ ದುಡಿಯುತ್ತ್ತಿಲ್ಲ. ಹಾಗಾಗಿ ಕಾಂಗ್ರೆಸ್- ಬಿಜೆಪಿ ಪಕ್ಷಗಳು ಒಂದಾಗಿ ದೇಶವನ್ನು ಪ್ರಗತಿ ಪಥದತ್ತ ಸಾಗಿಸಬೇಕಿದೆ.

ಅಭಿನಯ ಶಂಕರ್
ನಂದಿಪುರ

ಸಂಸತ್ತಿಗೆ ಕಳಂಕ

ವಿಶ್ವಾಸಮತಯಾಚನೆ ಸಂದರ್ಭದಲ್ಲಿ ನಡೆದ ಘಟನೆಗಳು ಸಂಸತ್ತಿನ ಮೌಲ್ಯಗಳಿಗೆ ಕಳಂಕ ತರುವಂತಹವು. ಈ ಕುರಿತು ಟಿಎಸ್‌ಐನ 'ಕಾಸಿನ ಕೈ ಚಳಕ' ಸಂಪಾದಕೀಯ ತರ್ಕಬದ್ಧವಾಗಿತ್ತು. ಆಡಳಿತ ಪಕ್ಷದ ನಾಯಕರು ಮತ್ತು ವಿರೋಧ ಪಕ್ಷಗಳ ನಾಯಕರ ನಡುವಿನ ಕೆಸರೆರಚಾಟದಿಂದ ಪ್ರಜಾಪ್ರಭುತ್ವಕ್ಕೆ ಮಸಿಬಳಿದಂತಾಗಿದೆ. ನೋಟಿನ ಕಂತೆಗಳನ್ನು ಪ್ರದರ್ಶಿಸಿ ಸಂಸತ್ತನ್ನು ಅವಮಾನಿಸಲಾಗಿದೆ. ಇಂತಹ ಮಾಹಿತಿಗಳನ್ನು ಅತ್ಯುತ್ತಮ ವಿಶ್ಲೇಷಣೆಯೊಂದಿಗೆ ನೀಡುವ ಟಿಎಸ್‌ಐ ಹೀಗೇ ಯಶಸ್ಸಿನತ್ತ ಸಾಗಲಿ.

ಕರುಣೋದಯ
ಹುಳಿಯಾರು

ವ್ಯವಸ್ಥೆ ಬದಲಾಗಲಿ

ಯುಪಿಎ ಸರಕಾರದ ವಿಶ್ವಾಸಮತ ಯಾಚನೆಯ ನಾಟಕಕ್ಕೆ ಪರದೆಯೇನೋ ಬಿತ್ತು ಸರಿ. ಆದರೆ ಯಾರು ಏನನ್ನು ಸಾಧಿಸಿದರು ಎಂದು ಕೊನೆಗೂ ತಿಳಿಯಲೇ ಇಲ್ಲ. ತಮ್ಮ ಕೈಯಲ್ಲಿರುವ ಅಧಿಕಾರವನ್ನು ಉಳಿಸಿಕೊಳ್ಳಲು ಮತ್ತು ಹೊಸದಾಗಿ ಅಧಿಕಾರವನ್ನು ಪಡೆದುಕೊಳ್ಳಲು ಈ ರಾಜಕಾರಣಿಗಳು ಯಾವ ಕೀಳುಮಟ್ಟಕ್ಕೆ ಇಳಿಯಬಲ್ಲರು ಎನ್ನುವುದನ್ನು ಇಡೀ ವಿಶ್ವಕ್ಕೆ ತೋರಿಸಿಕೊಟ್ಟರು. ಪ್ರಜಾಪ್ರಭುತ್ವದ ಮಂದಿರದೊಳಗೇ ಪ್ರಜಾಪ್ರಭುತ್ವದ ಕೊಲೆ ನಡೆದುಹೋಯಿತು. ಆದರೂ ಈ ಸಾವಿಗೆ ಮರುಕಪಟ್ಟವರು, ಅತ್ತವರೂ ಒಬ್ಬರೂ ಇರಲಿಲ್ಲ ಅಲ್ಲಿ. ಎಲ್ಲರದೂ ವಿಜಯದ ನಗೆಯೇ. ವಿರೋಧ ಪಕ್ಷದ ಸದಸ್ಯರದ್ದು ಯುಪಿಎಯನ್ನು ಸದನದೊಳಗೇ ನಗ್ನರನ್ನಾಗಿಸಿದ ನಗು. ಮರುಕಪಟ್ಟವರು ಅರಿಂದಮ್ ಚೌಧುರಿ ಅವರಂತಹ ಚಿಂತಕರು ಮತ್ತು ನಮ್ಮ- ನಿಮ್ಮಂತಹವರು ಮಾತ್ರ. ಇದಕ್ಕೆಲ್ಲಾ ಅಷ್ಟು ಸುಲಭದಲ್ಲಿ ಮುಕ್ತಾಯ ಹಾಡುವುದು ಕಷ್ಟ. ಇದು ಬೆಳೆಯುತ್ತಲೇ ಹೋಗುವುದು ಖಚಿತ. ಆದರೆ ತಕ್ಕ ಮಟ್ಟಿನ ಪರಿಹಾರ ಸಿಗಬೇಕೆಂದರೆ, ಎರಡು ಪಕ್ಷಗಳು ಮಾತ್ರ ಇರುವ ವ್ಯವಸ್ಥೆ ಭಾರತದಲ್ಲಿ ಬರಬೇಕಿದೆ. ಒಂದೋ ಇಲ್ಲಿರು, ಇಲ್ಲಾ ಅಲ್ಲಿರು. ಎರಡೂ ಸಾಧ್ಯವಾಗದೆ ಇದ್ದಲ್ಲಿ ಮನೆಯಲ್ಲೇ ಬಿದ್ದಿರು. ಹೀಗಾದೀತೇ? ಎಂದಾದೀತು?

ಆತ್ರಾಡಿ ಸುರೇಶ್ ಹೆಗ್ಡೆ
ಬೆಂಗಳೂರು

ವಾಸ್ತವಿಕ ಯೋಜನೆ ಬೇಕು

'ಬರದ ಬವಣೆ ಬಯಲು' (ಶಶಿ ಸಂಪಳ್ಳಿ) ಚಿಂತನಾರ್ಹ ಲೇಖನ. ಕರ್ನಾಟಕದ ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ನಮ್ಮ ರಾಜ್ಯ ಪ್ರಕಾಶಿಸುತ್ತಿದೆ ಎಂದು ಜಂಭ ಕೊಚ್ಚಿಕೊಳ್ಳುತ್ತಿದ್ದಾರೆ. ತಮ್ಮ ಸರ್ಕಾರ ಭದ್ರವಾಗಿರಲಿ ಎಂದು ಜಪತಪ ನಡೆಸುತ್ತಿದ್ದಾರೆಯೇ ವಿನಾ ವಾಸ್ತವ ಸಮಸ್ಯೆಗಳತ್ತ ಗಮನ ಹರಿಸುತ್ತಿಲ್ಲ ಎನ್ನುವುದು ರುಜುವಾತಾಗಿದೆ. ಅಧಿಕಾರಕ್ಕೆ ಬಂದು ಎರಡು ತಿಂಗಳಾದರೂ ತಮ್ಮೊಳಗಿನ ಭಿನ್ನಾಭಿಪ್ರಾಯಗಳನ್ನು ಪರಿಹರಿಸುವಲ್ಲೇ ಸಮಯ ಕಳೆಯುತ್ತಿದ್ದಾರೆ. ಯಾರಿಗಾಗಿ ಈ ಮೋಡ ಬಿತ್ತನೆ? ಅದಕ್ಕೆ ಬದಲಾಗಿ ರೈತರಿಗೆ ಪರಿಹಾರ ಒದಗಿಸಬಹುದಿತ್ತು. ವಾಸ್ತವಕ್ಕೆ ದೂರವಾಗಿರುವ ಯೋಜನೆಗಳನ್ನು ಕೈಗೆತ್ತಿಕೊಳ್ಳುವ ಬದಲಾಗಿ ಉತ್ತಮ ಯೋಜನೆಗಳನ್ನು ಸಮರ್ಪಕವಾಗಿ ಕಾರ್ಯರೂಪಕ್ಕೆ ತರುವ ಬಗ್ಗೆ ಚಿಂತನೆ ನಡೆಸುವುದು ಒಳಿತು.

ಎಂ.ಜಿ. ಮಹಂತೇಶ್ ಉಡಿಕೇರಿ
ಬೆಳಗಾವಿ

ವಿಪರ್ಯಾಸ

ಪರಮಾಣು ರಿಯಾಕ್ಟರ್‌ಗಳು ಪರಿಸರ, ಮಾನವ ಮತ್ತು ಇತರ ಜೀವಜಂತುಗಳ ಮೇಲೆ ಮಾರಕವಾಗುತ್ತಿರುವ ಬಗ್ಗೆ ಪ್ರಕಟವಾದ 'ಇಲ್ಲೇ ಇದೆ ಇಂಧನ ಮೂಲ!' (ಪ್ರಸೂನ್ ಮಜುಂದಾರ್) ಚಿಂತನಾರ್ಹ ಲೇಖನ. ಕೇಂದ್ರ ಸರ್ಕಾರ ಈ ಬಗ್ಗೆ ತಿಲಮಾತ್ರವೂ ಗಮನ ಹರಿಸಿಲ್ಲ ಎನ್ನುವುದು ವಿಪರ್ಯಾಸ. ಯೂರೋಪ್ ರಾಷ್ಟ್ರಗಳಲ್ಲಿ ಈಗಾಗಲೇ ಅಸ್ತಿತ್ವದಲ್ಲಿರುವ ಪರಮಾಣು ರಿಯಾಕ್ಟರ್‌ಗಳನ್ನು ಮುಚ್ಚಲು ನಿರ್ಧರಿಸಲಾಗಿದೆ ಮತ್ತು ಹೊಸ ರಿಯಾಕ್ಟರ್‌ಗಳ ಸ್ಥಾಪನೆಯಂತೂ ಕನಸಿನ ಮಾತಾಗಿದೆ. ಬದಲಾಗಿ ಯುರೋಪ್ ರಾಷ್ಟ್ರಗಳು ನೀರು- ಗಾಳಿಯಂತ್ರ- ಸೌರಶಕ್ತಿಯಿಂದ ಇಂಧನ ಪಡೆಯಲು ಮುಂದಾಗುತ್ತಿವೆ. ಕಳೆದ 30 ವರ್ಷಗಳಿಂದ ಸ್ವತಃ ಅಮೆರಿಕ ಯಾವುದೇ ಪರಮಾಣು ರಿಯಾಕ್ಟರ್‌ಗಳನ್ನು ತೆರೆದಿಲ್ಲ. ಜಗತ್ತಿನ ಶೇ. ೨೪ರಷ್ಟು ಯುರೇನಿಯಂ ಸಂಪನ್ಮೂಲವಿರುವ ಆಸ್ಟ್ರೇಲಿಯಾದಲ್ಲಿ ಒಂದೇ ಒಂದು ಪರಮಾಣು ರಿಯಾಕ್ಟರ್ ಇಲ್ಲ. ಇಂಥ ಪರಿಸ್ಥಿತಿಯಲ್ಲಿ ನಮ್ಮ ಕೇಂದ್ರ ಸರ್ಕಾರ ಪರಮಾಣು ರಿಯಾಕ್ಟರ್‌ಗಳ ನಿರ್ಮಾಣಕ್ಕೆ ಟೊಂಕ ಕಟ್ಟಿದೆ. ಎಂತಹ ವಿಪರ್ಯಾಸ?

ರೇ.ಚ. ರೇವಡಿಗಾರ
ಸಿಂಧಗಿ

'ಗುಲಾಬಿ' ಕಂಪು

ದೆಹಲಿಯಲ್ಲಿ ಪಸರಿಸಿದ ಗುಲಾಬಿಯ ಕಂಪು ಅದ್ಭುತವಾಗಿತ್ತು. ಆದರೆ ನಮ್ಮ ಕರ್ನಾಟಕದ ಯಾವುದೇ ಮಾಧ್ಯಮಗಳು ಈ ಪ್ರಶಸ್ತಿ ಸಮಾರಂಭಕ್ಕೆ ಇಷ್ಟೊಂದು ಅದ್ಭುತ ಪ್ರಚಾರ ಕೊಟ್ಟಿಲ್ಲ. ಗ್ಲಾಮರ್/ ಕ್ರೈಂ ಇದ್ದರಷ್ಟೇ ಹೆಚ್ಚು ಪ್ರಚಾರ ಕೊಡುವ ಮಾಧ್ಯಮದವರಿಗೆ ಕಾಸರವಳ್ಳಿ ಅವರ ಕಲಾತ್ಮಕ ಚಿತ್ರ ಅಥವಾ ಉಮಾಶ್ರೀ ಅವರ ಕಲಾ ಪ್ರತಿಭೆಯಲ್ಲಿ ಗ್ಲಾಮರ್ ಮುಖ ಕಂಡಿಲ್ಲವೇನೋ?! ಏನೇ ಆಗಲಿ, 'ಗುಲಾಬಿ' ತಂಡ ವಿಶ್ವಮಟ್ಟದ ಸ್ಪರ್ಧೆಯೊಂದರಲ್ಲಿ ಕನ್ನಡ ಚಿತ್ರರಂಗದ ಘನತೆಯನ್ನು ಎತ್ತಿ ಹಿಡಿದಿರುವುದು ನಮಗೆ ಹೆಮ್ಮೆಯ ವಿಚಾರ. ಕಾಸರವಳ್ಳಿಗೆ ಹಾಗೂ ಅವರ ತಂಡಕ್ಕೆ ಅಭಿನಂದನೆಗಳು. ಈ ಬಗ್ಗೆ ಮಾಹಿತಿ ನೀಡಿದ ಲೇಖಕರಿಗೆ (ಕೆ. ರಾಘವ ಶರ್ಮ) ಧನ್ಯವಾದಗಳು.

ಚಿನ್ಮಯ, ಮಂಗಳೂರು
ಇ-ಮೇಲ್ ಮೂಲಕ

ವಿಶೇಷ ಮಾಹಿತಿ

'ಓಸಿಯನ್ ಟಾಕೀಸ್‌ನಲ್ಲಿ ಗುಲಾಬಿಯ ಕಂಪು' (ಕೆ. ರಾಘವ ಶರ್ಮ) ಈ ಲೇಖನ ಮನೋಜ್ಞವಾಗಿ ಮೂಡಿಬಂದಿದೆ. ಸಿನಿಮಾ ಮತ್ತು ಚಿತ್ರತಂಡದ ಕುರಿತು ವಿಶೇಷ ಮಾಹಿತಿ ಒದಗಿಸಿದೆ.

ಶಂಶೀರ್, ಬುಡೋಳಿ
ಇ-ಮೇಲ್ ಮೂಲಕ

ಗುಲಾಬಿ...

ಕಾಸರವಳ್ಳಿಗೆ ಮತ್ತೂ ಉಮಕ್ಕನಿಗೆ ಪ್ರಶಸ್ತಿ ಸಿಕ್ಕಿದ್ದು ನನಗೇ ಪ್ರಶಸ್ತಿ ಸಿಕ್ಕಷ್ಟು ಸಂತೋಷವಾಗಿದೆ. ಲೇಖನ, ಸಂದರ್ಶನ, ಸೊಗಸಾಗಿದೆ. ಅಭಿನಂದನೆಗಳು.

ಮಂಡ್ಯ ರಮೇಶ್, ಬೆಂಗಳೂರು
ಇ-ಮೇಲ್ ಮೂಲಕ

ಅತ್ಯುತ್ತಮ ವಿನ್ಯಾಸ

'ದ ಸಂಡೆ ಇಂಡಿಯನ್' ಪತ್ರಿಕೆ ಭಾನುವಾರದ ರಜೆಯಷ್ಟೇ ಸೊಗಸಾಗಿದೆ. ರಜಾದಿನದ ಸವಿ ಸವಿಯಲು ಅತ್ಯುತ್ತಮ ಸುದ್ದಿ ಪತ್ರಿಕೆಯೊಂದು ನಮ್ಮ ಕೈಗೆ ಸಿಕ್ಕಂತಾಗಿದೆ. ಮನೋಹರವಾಗಿ ಮೂಡಿಬರುವ ಗ್ರಾಫಿಕ್‌ಗಾಗಿ ವಿಶೇಷ ಅಭಿನಂದನೆಗಳು.

ಫಯಾಜ್, ಬೆಂಗಳೂರು
ಇ-ಮೇಲ್ ಮೂಲಕ