ಇರಾಕ್ ವಿಷಯದಲ್ಲಿ ಕೂಡ ಹಾಗೇ. ಅಮೆರಿಕ ಯೋಧರ ಸರಣಿ ಸಾವನ್ನು ಕಂಡು ಸ್ಥಳೀಯರಲ್ಲಿ ತಮ್ಮ ಆಡಳಿತದ ವಿರುದ್ಧ ಹೆಚ್ಚುತ್ತಿರುವ ಆಕ್ರೋಶವನ್ನು ಅರಿತೂ ಮತ್ತೆ ಇರಾಕ್‌ನಲ್ಲಿನ ತನ್ನ ಕಾರ್ಯಾಚರಣೆಯನ್ನು ಮುಂದುವರಿಸುವುದು ಅಮೆರಿಕ ಅಧ್ಯಕ್ಷ ಬುಷ್ ಮತ್ತು ಅವರ ಆಡಳಿತಕ್ಕೆ ಸರಳವಾಗಿರಲಿಲ್ಲ. ಆದರೆ, ಅಲ್ಲಿನ ತೈಲ ನಿಕ್ಷೇಪ ಮತ್ತು ಇರಾಕ್ ಪುನರ್ ನಿರ್ಮಾಣದ ಅಗಾಧ ಪ್ರಮಾಣದ ಗುತ್ತಿಗೆಗಳ ಆಮಿಷ ಯಃಕಶ್ಚಿತ್ ಯೋಧರ ಸಾವಿಗಾಗಿ ಹಿಂದೆ ಸರಿಯದಂತೆ ಅವರನ್ನು ತಡೆದವು! ಇರಾಕಿನಲ್ಲಿ ಸಿಗಲಿರುವ ಭಾರೀ ರಸದೌತಣದ ಎದುರು ಯೋಧರ ಸಾವು ಯಾವ ಲೆಕ್ಕ!? ಆದರೂ, ದೇಶದ ಜನರ ಆಕ್ರೋಶ ಶಮನಕ್ಕೆ ಉಳಿದಿರುವ ದಾರಿ ಏನು ಎಂದು ಯೋಚಿಸಿದಾಗ ಬುಷ್‌ಗೆ ಹೊಳೆದದ್ದು ಹೊರಗುತ್ತಿಗೆಯ ಈ ಜಾಯಮಾನದಲ್ಲಿ ಅಮೆರಿಕ ಯೋಧರ ಜೀವವನ್ನೂ ಉಳಿಸಿಕೊಂಡು, ಅಲ್ಲಿ ಸಿಗಲಿರುವ ಭಾರೀ ವ್ಯವಹಾರದ ಲಾಭವನ್ನೂ ಗಳಿಸುವ ಉಪಾಯವೆಂದರೆ ಖಾಸಗಿ ಸೇನೆಯನ್ನು ಗುತ್ತಿಗೆ ಪಡೆಯುವುದು!

ಆಗ ಸಿಕ್ಕಿದ್ದೇ ಖಾಸಗಿ ಸೇನಾ ಸಂಸ್ಥೆಗಳು (ಪಿಎಂಸಿ). ಅವುಗಳ ಕೆಲಸವೆಂದರೆ ಅತ್ಯಂತ ಕಠಿಣ ತರಬೇತಿ ಹೊಂದಿದ ತಮ್ಮ ಪಡೆಯ ಮೂಲಕ ಇರಾಕಿನಲ್ಲಿನ ಅಮೆರಿಕದ ಆಸ್ತಿ-ಪಾಸ್ತಿಯನ್ನು ರಕ್ಷಿಸುವುದು. ಅಭಿವೃದ್ಧಿಶೀಲ ರಾಷ್ಟ್ರಗಳಿಂದ ಮಾನವ ಸಂಪನ್ಮೂಲವನ್ನು ಬಾಡಿಗೆ ಪಡೆಯುವ ಬಹುತೇಕ ಅಮೆರಿಕನ್ ಕಾರ್ಪೊರೇಟ್ ಕಂಪನಿಗಳಂತೆಯೇ ಈ ಪಿಎಂಸಿಗಳು ಕೂಡ. ಎಷ್ಟು ಬಡ ರಾಷ್ಟ್ರದಿಂದ ತಮ್ಮ ಪಡೆಗೆ ಯೋಧರನ್ನು ನೇಮಕ ಮಾಡಿಕೊಳ್ಳುತ್ತಾರೋ ಅಷ್ಟು ಅವರಿಗೆ ಲಾಭ. ಉದಾಹರಣೆಗೆ, ಬುಷ್ ಅವರ ಇರಾಕ್ ಕಾರ್ಯಾಚರಣೆಯಿಂದ ಬಹು ದೊಡ್ಡ ಲಾಭ ಪಡೆದ ಬ್ಲಾಕ್‌ವಾಟರ್ ಖಾಸಗಿ ಸೇನಾ ಸಂಸ್ಥೆಯನ್ನೇ ತೆಗೆದುಕೊಳ್ಳಿ. ಲ್ಯಾಟಿನ್ ಅಮೆರಿಕ ಮತ್ತು ಏಷ್ಯಾ ರಾಷ್ಟ್ರಗಳ ಮಾಜಿ ಸೈನಿಕರನ್ನು ನೇಮಕ ಮಾಡಿಕೊಳ್ಳುವ ಮೂಲಕ ಬಹುದೊಡ್ಡ ಪ್ರಮಾಣದ ಲಾಭವನ್ನೇ ಮಾಡಿತು. ಪೆರು, ಚಿಲಿ, ಫಿಜಿ ಮತ್ತು ನೇಪಾಳ ಸೇರಿದಂತೆ ಬಹುತೇಕ ರಾಷ್ಟ್ರಗಳಲ್ಲಿ ಭಾರೀ ಪ್ರಮಾಣದ ಬಡತನ ಮತ್ತು ನಿರುದ್ಯೋಗ ತೀವ್ರವಾಗಿದೆ. ಇತ್ತೀಚಿನ ವರದಿಗಳ ಪ್ರಕಾರ ಬಹುತೇಕ ಮಂದಿಗೆ ತಿಂಗಳಿಗೆ ಒಂದು ಸಾವಿರದಿಂದ 3000 ಡಾಲರ್‌ವರೆಗೆ ಸಂಬಳ ನೀಡಲಾಗಿದೆ. ಅವರ ದೇಶಗಳ ಸ್ಥಿತಿಗೆ ಹೋಲಿಸಿದರೆ ಪೆರು, ಚಿಲಿ ಮತ್ತಿತರ ಲ್ಯಾಟಿನ್ ಅಮೆರಿಕ ಅಥವಾ ಏಷ್ಯಾ ರಾಷ್ಟ್ರಗಳ ಮಂದಿಗೆ ಒಂದು ಸಾವಿರ ಡಾಲರ್ ಸಂಬಳವೆಂಬುದು ಕನಸಿನಲ್ಲೂ ಊಹಿಸಲಾಗದಷ್ಟೇ ಸರಿ. ಹಾಗೇ ಇತ್ತ ಬ್ಲಾಕ್‌ವಾಟರ್ ಮತ್ತು ಅಮೆರಿಕ ಸರ್ಕಾರಕ್ಕೆ ಅಂತಹವರು ಎರಡು ಬಗೆಯಲ್ಲಿ ಲಾಭದಾಯಕ. ಒಂದು ಸಾವಿನ ಬೆಲೆ ತೆತ್ತರೂ ಅದರ ಯಾವ ಅಂಜಿಕೆಯೂ ಇಲ್ಲದೆ ತಮ್ಮವರನ್ನು ಉಳಿಸಿಕೊಳ್ಳಬಹುದು ಎಂಬುದು. ಏಕೆಂದರೆ, ಈ ಜಗತ್ತಿನಲ್ಲಿ ಒಬ್ಬ ಅಮೆರಿಕನ್ನನ ಜೀವ ಉಳಿಸಲು ನೂರು ಮಂದಿ ಚಿಲಿಯನ್ನರು ಅಥವಾ ಪೆರುವಿಗರು ಜೀವ ತೆತ್ತರೂ ಅವರ ಜೀವಗಳಿಗೆ ಮೂರು ಕಾಸಿನ ಕಿಮ್ಮತ್ತೂ ಇಲ್ಲವಲ್ಲ!