ಮನೀಶ್, ಶಬನಮ್, ಲೋಕೇಶ್ ಮತ್ತು ಜಯಮ್ಮ ಅವರ ಕುಟುಂಬಗಳು ಪ್ರಾಯಶಃ 'ದ ಸಂಡೆ ಇಂಡಿಯನ್' ವಾರಪತ್ರಿಕೆಯನ್ನು ಓದುವುದಿಲ್ಲ. ಆದರೆ ನಮ್ಮ ನಿಮ್ಮಂಥವರು ಓದುತ್ತೇವಲ್ಲ. ವಿಚಿತ್ರವೆಂದರೆ ಮಾಧ್ಯಮಗಳ ಸುದ್ದಿ ಪ್ರಾಶಸ್ತ್ಯದ ಬಗೆ ಮತ್ತು ಪೊಲೀಸ್ ಪಡೆಯ ಪೂರ್ವಾಗ್ರಹ ಪೀಡಿತ ಮನೋಭಾವ ಬ್ರಿಟಿಷರ ಕಾಲದ ವಸಾಹತುಶಾಹಿ ನೀತಿಯನ್ನೇ ನೆನಪಿಸುತ್ತವೆ. ಇದು ಶ್ರೀಮಂತರು ಮತ್ತು ಬಡವರ ನಡುವಿನ ಗೋಡೆಯನ್ನು ಮತ್ತಷ್ಟು ಬಲಗೊಳಿಸುತ್ತಿದೆ. ಅದರಲ್ಲೂ ಶೋಷಣೆ ಮಾಡುವುದು, ಅನುಮಾನಪಡುವುದು, ದೌರ್ಜನ್ಯ ಎಸಗುವ ವಿಚಾರದಲ್ಲಂತೂ ಈ ತಾರತಮ್ಯ ಕಠೋರ ವಾಸ್ತವ. ನಿಜವಾಗಿಯೂ ರಾಜೇಶ್ ತಲ್ವಾರ್ ಅದೃಷ್ಟವಂತ. ಆತ ಸೀಮಾಪುರಿ ಅಥವಾ ಬಲ್ಲಭ್‌ಘರ್‌ನಂತಹ ಕೊಳಚೆ, ಗ್ರಾಮೀಣ ಪ್ರದೇಶದ ನಿವಾಸಿ ಅಲ್ಲ. ಕಂಬಿಯ ಹಿಂದೆ 50 ದಿನಗಳನ್ನು ಕಳೆದರೂ ಆತ ಇನ್ನೂ ಜೀವಂತವಿದ್ದಾನೆ. ಆತನ ವಕೀಲರು ಪೊಲೀಸ್ ದೌರ್ಜನ್ಯದ ಬಗ್ಗೆ ಅಧಿಕೃತವಾಗಿ ದೂರು ನೀಡಿಲ್ಲ. ಪೊಲೀಸ್ ಅಥವಾ ನ್ಯಾಯಾಂಗ ಬಂಧನದಲ್ಲಿ ಮೃತಪಡುವ ವಿಷಯ ಬೇಡ; ಕಡೇ ಪಕ್ಷ ಪೊಲೀಸ್ ಬಂಧನ ಅನುಭವಿಸಿ ಹೊರಬರುವ ಎಲ್ಲಾ ಬಡವರಲ್ಲೂ ಕಂಡುಬರುವಂತೆ ತಲ್ವಾರ್ ಮೈಮೇಲೆ ಹಿಂಸೆಯ ಕುರುಹುಗಳೂ ಕಂಡುಬಂದಿಲ್ಲ.

ಅಷ್ಟರ ಮಟ್ಟಿಗೆ ಭಾರತೀಯ ಪ್ರಜಾಪ್ರಭುತ್ವವನ್ನು ನಾವು 'ಶ್ಲಾಘಿಸಲೇ'ಬೇಕು. ಪೊಲೀಸರು ಬಡ ಆರೋಪಿಗಳು ಅಥವಾ ಶಂಕಿತರ ಬಗ್ಗೆ 'ವ್ಯಕ್ತಿತ್ವ ಇಲ್ಲದವ', 'ದುಷ್ಟ', 'ವಿಚಿತ್ರ ಮನೋಭಾವದವ', 'ವಿಕೃತ ಕಾಮಿ', 'ಅನಾಗರಿಕ' ಎಂದೆಲ್ಲಾ ವಿಶೇಷಣಗಳನ್ನು ಹಚ್ಚಿ ಹೇಳುವುದು ಮಾಮೂಲು. ನಮ್ಮ ಮಾಧ್ಯಮಗಳು ಕೂಡಾ ಯಾವುದೇ ಬಗೆಯ 'ಕ್ರಾಸ್ ಚೆಕ್' ಮಾಡದೇ ಅವೇ ಬಗೆಯ ವಿಶೇಷಣಗಳನ್ನು ಶಂಕಿತರ ಮೇಲೆ ಆರೋಪಿಸುವುದೂ ಹೊಸತಲ್ಲ. ಹಾಗೆಯೇ ಬಡಜನರಲ್ಲಿ ನೈತಿಕತೆಯ ತಳಪಾಯವೇ ಇಲ್ಲದಿರುವ ಬಗ್ಗೆ ಮಧ್ಯಮ ವರ್ಗದ ಜನ 'ಗಾಸಿಪ್' ಮಾಡುವುದಕ್ಕೂ ಇಂತಹ ಸುದ್ದಿಗಳು ಪ್ರೇರಣೆ ನೀಡುತ್ತವೆ. ಆದರೆ ಇಲ್ಲಿ ಶ್ರೀಮಂತ ಮತ್ತು ಪ್ರಭಾವಿಯೂ ಆದ ತಲ್ವಾರ್‌ನನ್ನು ಪೊಲೀಸರು ನಿಷ್ಪಕ್ಷಪಾತವಾಗಿಯೇ ಬಂಧಿಸಿದ್ದಾರೆ. ಜೈಲಿನಲ್ಲೂ ಸಾಮಾನ್ಯ 'ಟ್ರೀಟ್‌ಮೆಂಟ'ನ್ನೇ ನೀಡಿದ್ದಾರೆ. ಬಡಜನರ ಅನೈತಿಕ ವ್ಯಾಪಾರಗಳ ಬಗೆಗಿನ 'ರೆಡಿಮೇಡ್ ಸುದ್ದಿ'ಯಂತೆಯೇ ತಲ್ವಾರ್ ಸುದ್ದಿಯನ್ನೂ ಮಾಧ್ಯಮಗಳು ದಿಢೀರನೇ ಪ್ರಕಟಿಸಿಬಿಟ್ಟು 'ಸಾರ್ವಜನಿಕ ಹಿತಾಸಕ್ತಿ' ಮೆರೆದಿವೆ. ಆದರೆ ಈ ಪ್ರಕರಣದಲ್ಲಂತೂ ಮಧ್ಯಮ ವರ್ಗದ ಭಾರತೀಯರ ಕೊಲೆ, ಮಕ್ಕಳನ್ನು ಬೆಳೆಸುವುದು, ಲೈಂಗಿಕ ಸಂಬಂಧಗಳು, ಹದಿಹರೆಯದ ಹುಡುಗಿಯ ಸಮಸ್ಯೆಗಳು, ಮನೆಕೆಲಸದವರಿಂದಾಗುವ ತೊಂದರೆಗಳು ಇತ್ಯಾದಿಗಳ ಬಗ್ಗೆ ಉಪದೇಶ ಕೊಡುವ, ನಾನಾ ಸಿದ್ಧಾಂತಗಳನ್ನು ಹೇಳುವ ತಜ್ಞ ವಿಶ್ಲೇಷಕರಾಗಿಬಿಟ್ಟರು.

ಜಾಹೀರಾತು ತಜ್ಞ ಮತ್ತು ಅಂಕಣಕಾರ ಸಂತೋಷ್ ದೇಸಾಯಿ ಅವರು ಹೇಳುವಂತೆ, "ಭಾರತೀಯ ಮಧ್ಯಮ ವರ್ಗದ ಮೇಲೆ 24ಗಂಟೆಯ ಟಿವಿ ಚಾನಲ್‌ಗಳು ಯಾವ ಪರಿ ಮುಗಿಬಿದ್ದಿವೆ ಎಂದರೆ ಅವು ತಮ್ಮ ಟಿಆರ್‌ಪಿಗಾಗಿ ಏನನ್ನು ಬೇಕಾದರೂ ಮಾಡಬಲ್ಲವು. ಅವುಗಳ ಅನಾರೋಗ್ಯಕರ ಸ್ಪರ್ಧೆಗೆ ಮಿತಿಯೇ ಇಲ್ಲದಂತಾಗಿದೆ. ವೀಕ್ಷಕರನ್ನು ಸೆಳೆಯಲು ರೋಚಕವಾದ ಮತ್ತು ವಿಚಿತ್ರವಾದ ಸುದ್ದಿ ನೀಡುವ ಮತ್ತು ಅದನ್ನು ಅತಿರಂಜಿಸುವ ಪರಿಪಾಠ ಟಿವಿ ಚಾನಲ್‌ಗಳಲ್ಲಿ ಈಗ ಹೆಚ್ಚಾಗಿ ಬೆಳೆಯುತ್ತಿದೆ. ಈ ಅಪಾಯಕಾರಿ ಸಾಂಕ್ರಾಮಿಕ ರೋಗಕ್ಕೆ ಪ್ರತಿಯೊಬ್ಬರೂ ಬಲಿಯಾಗುತ್ತಿದ್ದಾರೆ".

ಹಿರಿಯ ವರದಿಗಾರ ಆಶುತೋಷ್ ಅವರು, "ಕುಖ್ಯಾತ ಜೆಸಿಕಾ ಲಾಲ್, ಪ್ರಿಯದರ್ಶಿನಿ ಮಟ್ಟೂ, ಮಧುಮಿತಾ ಶುಕ್ಲಾ ಮತ್ತು ನಿತೀಶ್ ಕತಾರ ಮುಂತಾದ ಪ್ರಕರಣಗಳಲ್ಲಿ ಬಲಿಪಶುಗಳ ಕುಟುಂಬಗಳು ನ್ಯಾಯ ಪಡೆಯಲು ನೆರವಾದದ್ದು ಇವೇ ಮಾಧ್ಯಮಗಳು, ನಿಜ. ಆದರೆ ಮಧ್ಯಮ ವರ್ಗಗಳ ಬಗ್ಗೆ ಏನು? ಆ ವರ್ಗ ಮತ ಚಲಾಯಿಸುವುದನ್ನು ತ್ಯಜಿಸಿ ಬಹುಕಾಲವಾಯಿತು; ಆ ವರ್ಗ ಖಾಸಗಿ ರಕ್ಷಣಾ ವ್ಯವಸ್ಥೆ, ಖಾಸಗಿ ನೀರು ಮತ್ತು ವಿದ್ಯುತ್ ಪೂರೈಕೆ ವ್ಯವಸ್ಥೆ ರೂಪಿಸಿಕೊಂಡಿದೆ. ಜಾಗತೀಕರಣದ ಪ್ರಭಾವಕ್ಕೆ ಒಳಗಾದ ಆ ವರ್ಗಕ್ಕೆ ಈಗ ಅತ್ಯಾಧುನಿಕ ಮಾಲ್‌ಗಳೇ ಸಂತೆ, ಮಲ್ಟಿಪ್ಲೆಕ್ಸ್‌ಗಳೇ ದೇಗುಲ. ಹೀಗಾಗಿ ಆ ವರ್ಗ ಇದೀಗ ಒಂದರ್ಥದಲ್ಲಿ ಭಾರತೀಯ ಗಣರಾಜ್ಯದಿಂದ ಪ್ರತ್ಯೇಕವೇ ಆಗಿಬಿಟ್ಟಿದೆ" ಎಂದು ಆತಂಕ ವ್ಯಕ್ತಪಡಿಸುತ್ತಾರೆ.

ಆದರೆ ಆರುಷಿ ಪ್ರಕರಣದಲ್ಲಿ ಆ ವರ್ಗದ ನಿಜವಾದ ಬಣ್ಣ ಹೊರಕ್ಕೆ ಬಂತು. ಅಂದರೆ 'ರಾಗ್ ದರ್ಬಾರಿ' ಕಾದಂಬರಿಯಲ್ಲಿ ಬರುವಂತೆ ಗಾಸಿಪ್ ಮಾಡುವುದು, ಕಾಲೆಳೆಯುವುದು, ವಂಚನೆ ಮುಂತಾದ ತನ್ನ 'ಸಾಂಪ್ರದಾಯಿಕ ಣ'ಗಳನ್ನು ಬಹಿರಂಗಪಡಿಸಿತು. ಆ ಪುಸ್ತಕದಲ್ಲಿ ಹಲವು ಗ್ರಾಮಸ್ಥರು ಗಾಸಿಪ್ ಮಾಡುವುದು, ಕಾಲೆಳೆಯುವುದು, ಇನ್ನೊಬ್ಬರಲ್ಲಿ ಹುಳುಕು ಹುಡುಕುತ್ತಾ ಹರಟುವುದರಲ್ಲೇ ಕಾಲ ಕಳೆಯುತ್ತಿರುತ್ತಾರೆ.

ಹೀಗಾಗಿ 24 ಗಂಟೆ ಸುದ್ದಿವಾಹಿನಿಗಳ ದೆಸೆಯಿಂದ 200 ದಶಲಕ್ಷ ಮಧ್ಯಮ ವರ್ಗದ ಭಾರತೀಯರು ಒಂದೇ ಏಟಿಗೆ ಭಾರತದ 'ಟಿಪಿಕಲ್ ಗ್ರಾಮಸ್ಥ'ರಂತೆ ವರ್ತಿಸಿದರು. ಇದಕ್ಕೆ ನೋಯ್ಡಾದ ಆರುಷಿ ಹತ್ಯೆ ಪ್ರಕರಣ ಒಂದು ನೆಪವಾಯಿತಷ್ಟೇ!

ಟಿಎಸ್‌ಐ

ಆರುಷಿ-ಹೇಮ್‌ರಾಜ್ ಹತ್ಯೆ ನಂತರದ ಬೆಳವಣಿಗೆ

ಮೇ 16, 2008: ದಂತ ವೈದ್ಯ ದಂಪತಿಗಳ ಪುತ್ರಿ ಆರುಷಿ ತಲ್ವಾರ್ ತನ್ನ ಬೆಡ್‌ರೂಂನಲ್ಲಿ ಕುತ್ತಿಗೆ ಸೀಳಿ ಕೊಲೆಯಾದ ಸ್ಥಿತಿಯಲ್ಲಿ ಪತ್ತೆಯಾದಳು. ಮನೆ ಕೆಲಸದಾಳು ಹೇಮ್‌ರಾಜ್ ಮೇಲೆ ಪೊಲೀಸರ ಅನುಮಾನದ ದೃಷ್ಟಿ.

ಮೇ 17: ತಲ್ವಾರ್ ದಂಪತಿಗಳ ನಿವಾಸದ ಟೆರೆಸ್‌ನಲ್ಲಿ ಹೇಮ್‌ರಾಜ್ ಮೃತ ದೇಹ ಪತ್ತೆ. ಎಲ್ಲರ ಊಹೆಯನ್ನು ಹುಸಿಗೊಳಿಸಿ, ಆರುಷಿ ಮೇಲೆ ಯಾವುದೇ ಲೈಂಗಿಕ ಹಲ್ಲೆ ನಡೆದಿಲ್ಲ ಎಂಬುದನ್ನು ದೃಢಪಡಿಸಿದ ಮರಣೋತ್ತರ ಪರೀಕ್ಷಾ ವರದಿ.

ಮೇ 18: ಪೊಲೀಸರ ಪ್ರಕಾರ ಆರುಷಿ ಹತ್ಯೆಗೆ ಹರಿತವಾದ ಶಸ್ತ್ರ ಚಿಕಿತ್ಸೆಗೆ ಬಳಸುವ ಉಪಕರಣವನ್ನು ಉಪಯೋಗಿಸಲಾಗಿತ್ತು. ರಾಜ್ಯದ ವಿಶೇಷ ತನಿಖಾ ದಳ (ಎಸ್‌ಟಿಎಫ್) ಪ್ರಕರಣದ ತನಿಖೆ ನಡೆಸಲಿದೆ ಎಂದ ಉತ್ತರ ಪ್ರದೇಶ ಪೊಲೀಸ್ ಪಡೆಯ ಎಡಿಜಿ ಬ್ರಿಜ್ ಲಾಲ್.

ಮೇ 19: ತಲ್ವಾರ್ ಕುಟುಂಬದ ಹಿಂದಿನ ಮನೆ ಕೆಲಸದಾಳು ವಿಷ್ಣು ಶರ್ಮ ಮೇಲೆ ಪೊಲೀಸರ ಸಂಶಯದ ಕತ್ತಿ ತೂಗಲಾರಂಭಿಸಿತು.

ಮೇ 21: ಕೊಲೆ ಪ್ರಕರಣದ ತನಿಖೆಗೆ ದೆಹಲಿ ಪೊಲೀಸರ ಸಹಭಾಗಿತ್ವ. 'ವೈದ್ಯ ಅಥವಾ ಕಟುಕ'ನಿಂದ ಈ ಕೊಲೆ ನಡೆದಿದೆ ಎಂದು ಪೊಲೀಸರು ತಿಳಿಸಿದರು.

ಮೇ 22: ತಲ್ವಾರ್ ಕುಟುಂಬದ ಮೇಲೆ ಪೊಲೀಸರ ಅನುಮಾನ. ಕುಟುಂಬ ಗೌರವ ಕಾಪಾಡಲು ಹತ್ಯೆ ಮಾಡಿರಬಹುದಾದ ಸಾಧ್ಯತೆಯ ಕುರಿತು ತನಿಖೆ.

ಮೇ 23: ಆರುಷಿ ತಂದೆ ರಾಜೇಶ್ ತಲ್ವಾರ್ ಅವರ ಬಂಧನ. ಮೀರತ್ ವಲಯದ ಪೊಲೀಸ್ ಐಜಿ ಗುರುದರ್ಶನ್ ಸಿಂಗ್ ಹೇಳುವಂತೆ, 'ತನ್ನ ಮಗಳನ್ನು ಮನೆಗೆಲಸದಾಳು ಹೇಮ್‌ರಾಜ್ ಜೊತೆ ಅನುಚಿತ ಭಂಗಿಯಲ್ಲಿ ನೋಡಿದ ಕಾರಣ ತಂದೆಯಿಂದಲೇ ಮಗಳ ಕೊಲೆ". ರಾಜೇಶ್ ತಲ್ವಾರ್ ಅವರಿಗೆ ನ್ಯಾಯಾಂಗ ಬಂಧನ.

ಮೇ 24: ತನ್ನ ಪತಿ ನಿರಪರಾಧಿ ಎಂದು ಸಮರ್ಥಿಸಿದ ನೂಪುರ್ ತಲ್ವಾರ್ (ಆರುಷಿಯ ತಾಯಿ). ಘಾಜಿಯಾಬಾದ್‌ನ ದಾಸ್ನಾ ಜೈಲಿನಲ್ಲಿ ರಾಜೇಶ್ ತಲ್ವಾರ್ ಅವರನ್ನು ಭೇಟಿ ಮಾಡಿದ ನೂಪುರ್ ತಲ್ವಾರ್.

ಮೇ 26: ರಾಜೇಶ್ ತಲ್ವಾರ್ ಜೊತೆ ಅಕ್ರಮ ಸಂಬಂಧ ಇತ್ತು ಎಂಬುದನ್ನು ನಿರಾಕರಿಸಿದ ದಂತವೈದ್ಯೆ ಅನಿತಾ ದುರಾನಿ. ಪೊಲೀಸರ ಪ್ರಕಾರ ಈ ಅಕ್ರಮ ಸಂಬಂಧವನ್ನು ಆಕ್ಷೇಪಿಸಿದ್ದೇ ಆರುಷಿ ಹತ್ಯೆಗೆ ಕಾರಣ.

ಮೇ 22: ತಲ್ವಾರ್ ಅವರನ್ನು ಮೂರುದಿನಗಳ ಕಾಲ ಪೊಲೀಸ್ ವಶಕ್ಕೆ ತೆಗೆದುಕೊಳ್ಳಲಾಯಿತು. ಕುಟುಂಬ ಸಿಬಿಐ ತನಿಖೆಗೆ ಒತ್ತಾಯಿಸಿತ್ತು.

ಮೇ 28: ಆರುಷಿಯ ತೇಜೋವಧೆ ಮಾಡಿದ್ದಕ್ಕಾಗಿ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವೆ ರೇಣುಕಾ ಚೌಧುರಿ ಉತ್ತರ ಪ್ರದೇಶ ಪೊಲೀಸರನ್ನು ಟೀಕಿಸಿದರು. ಈ ಪ್ರಕರಣವನ್ನು ತನಿಖೆ ಮಾಡುತ್ತಿದ್ದ ಅಧಿಕಾರಿ ತೃತೀಯ ಬಾರಿ ಬದಲಾದರು.

ಮೇ 29: ಉತ್ತರ ಪ್ರದೇಶ ಸರ್ಕಾರ ಸಿಬಿಐ ತನಿಖೆಗೆ ಶಿಫಾರಸು ಮಾಡಿತು.

ಜೂನ್ 1: ಸಿಬಿಐ ರಾಜೇಶ್ ತಲ್ವಾರ್ ವಿರುದ್ಧ ಕೇಸು ದಾಖಲಿಸಿತು

ಜೂನ್ 2: ಸಿಬಿಐ ತಲ್ವಾರ್ ಮನೆಯನ್ನು ಪರಿಶೋಧನೆ ನಡೆಸಿದ್ದಲ್ಲದೆ ಅನಿತಾ ದುರಾನಿ ಅವರನ್ನು ವಿಚಾರಣೆಗೆ ಒಳಪಡಿಸಿತು. ಒಂದು ದಿನದ ಮಟ್ಟಿಗೆ ಡಾ. ರಾಜೇಶ್ ಅವರನ್ನು ವಶಕ್ಕೆ ತೆಗೆದುಕೊಂಡಿತು.

ಜೂನ್ 3:ಮುಖ್ಯಮಂತ್ರಿ ಮಾಯಾವತಿ ಜೋಡಿ ಕೊಲೆಗೆ ಸಂಬಂಧಿಸಿದಂತೆ ರಾಜ್ಯ ಪೊಲೀಸರನ್ನು ಸಮರ್ಥಿಸಿಕೊಂಡರು.

ಜೂನ್ 4: ಕೊಲೆ ಆರೋಪಕ್ಕೆ ಒಳಗಾದ ರಾಜೇಶ್ ತಲ್ವಾರ್ ಅವರನ್ನು ಸಿಬಿಐ ವಶದಲ್ಲಿಯೇ ಸುಳ್ಳು ಪತ್ತೆ ಹಚ್ಚುವ ಪರೀಕ್ಷೆಗೆ ಒಳಪಡಿಸಲಾಯಿತು.

ಜೂನ್ 10: ತಲ್ವಾರ್ ಅವರ ಕಂಪೌಂಡರ್ ಕೃಷ್ಣ ಅವರನ್ನು ಸುಳ್ಳು ಪತ್ತೆ ಹಚ್ಚುವ ಪರೀಕ್ಷೆಗೆ ಒಳಪಡಿಸಲಾಯಿತು. ಈಗ ಅವರು ಪ್ರಮುಖ ಶಂಕಿತ ಆರೋಪಿ. ಸಿಬಿಐ ಮತ್ತೊಮ್ಮೆ ತಲ್ವಾರ್ ಮನೆಯನ್ನು ಶೋಧಿಸಿತು.

ಜೂನ್ 12: ಕೃಷ್ಣ ಮಂಪರು ಪರೀಕ್ಷೆ ಅಥವಾ ಸುಳ್ಳು ಪತ್ತೆ ಹಚ್ಚುವ ಪರೀಕ್ಷೆಗೆ ಒಳಪಟ್ಟರು.

ಜೂನ್ 13: ಸುಳ್ಳು ಪತ್ತೆ ಪರೀಕ್ಷಾ ಫಲಿತಾಂಶದ ಆಧಾರದಲ್ಲಿ ಸಿಬಿಐ ಡಾ. ರಾಜೇಶ್ ತಲ್ವಾರ್ ಅವರ ಕಂಪೌಂಡರ್ ಕೃಷ್ಣ (ಅಲಿಯಾಸ್ ಕಿಶನ್) ಅವರನ್ನು ಬಂಧಿಸಿತು.

ಜೂನ್ 14: ಸಿಬಿಐ ತಂಡ ಕೃಷ್ಣ ಅವರ ನಿವಾಸಗಳಾದ ಜಲ್ವಾಯು ವಿಹಾರ್, ನೋಯ್ಡಾಗಳನ್ನು ಶೋಧಿಸಿತು. ಅಲ್ಲಿಂದ ಸಿಬಿಐ ತಂಡ ಬಟ್ಟೆಬರೆ ಮತ್ತಿತರ ವಸ್ತುಗಳನ್ನು ಬೆರಳಚ್ಚು ಪರೀಕ್ಷೆಗಾಗಿ ವಶಪಡಿಸಿಕೊಂಡಿತು. ದುರಾನಿ ಅವರ ಮನೆಕೆಲಸದ ವ್ಯಕ್ತಿ ರಾಜ್‌ಕುಮಾರ್ ಅವರನ್ನು ಮಂಪರು ಪರೀಕ್ಷೆಗೆ ಒಳಪಡಿಸಲಾಯಿತು.

ಜೂನ್ 12: ಕೃಷ್ಣ ಅವರನ್ನು ಸಿಬಿಐ ನ್ಯಾಯಾಲಯದ ಮುಂದೆ ಹಾಜರು ಪಡಿಸಲಾಯಿತು. ಕೃಷ್ಣ ಅವರನ್ನು ಹನ್ನೊಂದು ದಿನಗಳವರೆಗೆ ವಶಕ್ಕೆ ತೆಗೆದುಕೊಳ್ಳುವ ಸಿಬಿಐ ಅಹವಾಲಿಗೆ ಆರು ದಿನಗಳ ಅವಕಾಶ ಮಾತ್ರ ಸಿಕ್ಕಿತು.

ಜೂನ್ 20: ದೆಹಲಿಯ ಸಿಎಫ್‌ಎಸ್‌ಎಲ್‌ನಲ್ಲಿ ರಾಜೇಶ್ ತಲ್ವಾರ್ ಅವರ ಮೇಲೆ ಸುಳ್ಳು ಪತ್ತೆ ಹಚ್ಚುವ ಪರೀಕ್ಷೆ ನಡೆಯಿತು.

ಜೂನ್ 25: ನೂಪುರ್ ತಲ್ವಾರ್ ಮೇಲೆ ನಡೆಸಿದ ಮೊದಲ ಸುಳ್ಳು ಪತ್ತೆ ಹಚ್ಚುವ ಪರೀಕ್ಷೆ ಯಶಸ್ವಿಯಾಗದೆ ಇದ್ದುದರಿಂದ ಎರಡನೇ ಬಾರಿ ಅವರನ್ನು ಪರೀಕ್ಷೆಗೆ ಒಡ್ಡಲಾಯಿತು.

ಜೂನ್ 22: ಸಿಬಿಐ ಕೃಷ್ಣ ಅವರನ್ನು ತಲ್ವಾರ್ ನಿವಾಸಕ್ಕೆ ಕರೆದೊಯ್ಯಿತು. ದುರಾನಿ ಕುಟುಂಬದ ಮನೆಕೆಲಸದ ವ್ಯಕ್ತಿ ರಾಜ್‌ಕುಮಾರ್‌ನನ್ನು ಬಂಧಿಸಲಾಯಿತು. ಮಾನವ ರಕ್ತವಿರುವ ಸ್ವಚ್ಛ ಮಾಡಿದ ಟಿ ಶರ್ಟ್‌ಗಳನ್ನು ವಶಪಡಿಸಿಕೊಳ್ಳಲಾಯಿತು. ಇದರಲ್ಲಿನ ರಕ್ತದ ಡಿಎನ್‌ಎ ಹೋಲಿಕೆ ದೃಢವಾಯಿತು.

ಜುಲೈ 9: ರಾಜ್‌ಕುಮಾರ್‌ನನ್ನು ನಾರ್ಕೋ ಅನಾಲಿಸಿಸ್ ಪರೀಕ್ಷೆಗೆ ಒಳಪಡಿಸಲಾಯಿತು.

ಜುಲೈ 10: ಮಾಧ್ಯಮಗಳ ವರದಿ ಪ್ರಕಾರ ರಾಜ್‌ಕುಮಾರ್ ತನ್ನ ತಪ್ಪೊಪ್ಪಿಕೊಂಡಿದ್ದು, ಹಲವು ಸತ್ಯಗಳನ್ನು ಸಿಬಿಐಗೆ ತಿಳಿಸಿದ್ದಾನೆ. ಆತ ಹತ್ಯೆಗೆ ಕೃಷ್ಣ, ಸಾಂಭು ಹಾಗೂ ಹೇಮ್‌ರಾಜ್‌ನ ನೆರವು ಪಡೆದುಕೊಂಡಿದ್ದ ಎನ್ನಲಾಗಿತ್ತು.

ಜುಲೈ 11: ಸಿಬಿಐ ಮೂವರು ಮನೆಗೆಲಸದಾಳುಗಳು ಹಾಗೂ ಕೃಷ್ಣ ಕೊಲೆಯ ಹಿಂದಿನ ಮುಖ್ಯ ಆರೋಪಿಗಳು ಎಂಬುದನ್ನು ದೃಢವಾಗಿ ಹೇಳಿತು. ಆದರೆ ಸಿಬಿಐನ ಪಾಲಿಗ್ರಾಫ್ ಪರೀಕ್ಷೆ ನ್ಯಾಯಾಲಯದಲ್ಲಿ ಸ್ವೀಕಾರಾರ್ಹವಲ್ಲ. ಹತ್ಯೆಗೆ ಬಳಸಿದ ಆಯುಧ ಹಾಗೂ ಆರುಷಿ, ಹೇಮ್‌ರಾಜ್‌ನ ಮೊಬೈಲ್ ಫೋನ್- ಗಳನ್ನು ಇನ್ನೂ ವಶಪಡಿಕೊಂಡಿಲ್ಲ.

ಜುಲೈ 12: ಗಾಜಿಯಾಬಾದ್‌ನ ದಾಸ್ನಾ ಜೈಲಿನಿಂದ ರಾಜೇಶ್ ತಲ್ವಾರ್ ಬಿಡುಗಡೆ.

ಟಿಎಸ್‌ಐ