ಕಾನೂನಿನ ದೃಷ್ಟಿಯಲ್ಲಿ ಎಲ್ಲರೂ ಸಮಾನರೇ?

ಟಿಎಸ್‌ಐನ ಏಳು ಜನರನ್ನೊಳಗೊಂಡ ತಂಡ 24 ಜನ 'ಕಂಬಿ ಹಿಂದಿನ ಕುಖ್ಯಾತ'ರ ಕುರಿತು ಬರೆದ ಲೇಖನದ ಗುಚ್ಛ ಭಾರತದ ನ್ಯಾಯಾಂಗ ವ್ಯವಸ್ಥೆಗೆ ಹಿಡಿದ ಕೈಗನ್ನಡಿಯಾಗಿತ್ತು. ಹೌದು, ಭಾರತದಲ್ಲಿ ಹೀಗೆಯೇ. ಅಪರಾಧ ಮಾಡಿದವನಿಗೆ ಶಿಕ್ಷೆ ಪ್ರಕಟಿಸುವ ಮೊದಲು ಆತ ಯಾವ ಪಕ್ಕಕ್ಕೆ ಸೇರಿದವನು? ಯಾರ ಮಗ? ಶ್ರೀಮಂತನೋ ಬಡವನೋ? ಎಂಬ 'ಮಾನದಂಡ'ದ ಮೂಲಕ ಪರೀಕ್ಷಿಸುವ ಜಾಯಮಾನ ಬೆಳೆಯುತ್ತಿದೆ. ಇದು ಇತ್ತೀಚಿನ ತೀರ್ಪುಗಳಲ್ಲಿ ಮೇಲ್ನೋಟಕ್ಕೆ ಕಂಡುಬರುತ್ತಿದೆ. 'ಕಾನೂನಿನ ದೃಷ್ಟಿಯಲ್ಲಿ ಎಲ್ಲರೂ ಸಮಾನರು' ಎಂಬುದು ಕಾನೂನು ಗ್ರಂಥಗಳಿಗೆ ಮಾತ್ರ ಸೀಮಿತವಾಗಿದೆ. ಕಾರ್ಯರೂಪದಲ್ಲಿ ಅದೆಲ್ಲಾ ಶೂನ್ಯ, ನಗಣ್ಯ! ಕಂಬಿ ಹಿಂದಿನ ಕುಖ್ಯಾತರಲ್ಲಿ ಕೆಲವರು ತಮ್ಮ ಸದ್ಗುಣಗಳ ಮೂಲಕ ಖ್ಯಾತರಾಗುತ್ತಿರುವುದು ಬದಲಾವಣೆಯ ಸಂಕೇತ. ಜೈಲಿನಲ್ಲಾದರೂ 'ಎಲ್ಲರೂ ಸಮಾನರು' ಎಂಬ ಕಾನೂನು ಜಾರಿಗೆ ಬರಲಿ. ಇಲ್ಲದಿದ್ದರೆ ಸವಲತ್ತು ಅನುಭವಿಸುತ್ತಿರುವವರ 'ಪ್ರಭಾವ' ಇನ್ನೂ ಹೆಚ್ಚಾದೀತು!

ಇರ್ಷಾದ್ ಎಂ.
ವೇಣೂರು

ಅಧಿಕಾರ ದುರುಪಯೋಗ

ಟಿಎಸ್‌ಐನ 'ಕಂಬಿ ಹಿಂದಿನ ಕುಖ್ಯಾತರು' ಲೇಖನ ಅತ್ಯಂತ ಆಕರ್ಷಕವಾಗಿ ಮೂಡಿಬಂದಿದೆ. ದೇಶದ ಕುಖ್ಯಾತ ಜೈಲು ಹಕ್ಕಿಗಳು ಜೈಲೊಳಗೇ ಕುಳಿತುಕೊಂಡು ಏನೆಲ್ಲಾ ವ್ಯವಹಾರಗಳನ್ನು ನಿರಾತಂಕವಾಗಿ ನಡೆಸುತ್ತಿದ್ದಾರೆಂಬುದನ್ನು ಪತ್ರಿಕೆ ವಿವರವಾಗಿ ತಿಳಿಸಿದೆ. ತಿಹಾರ್ ಜೈಲಿನ ವಾಸ್ತವಾಂಶಗಳ ಬಗ್ಗೆ ಮುಂಬೈ ಹೈಕೋರ್ಟ್ ವಕೀಲ ಶಾಹೀದ್ ಅಜ್ಮಿ ಅವರು ನೀಡಿದ ವಿವರ ಓದಿದಾಗ ನಿಜಕ್ಕೂ ಆಶ್ಚರ್ಯವಾಗಿದೆ. ಜೈಲಿನಲ್ಲಿನ ಅವರ ಅನುಭವಗಳು ರೋಚಕ. ಇವೆಲ್ಲದರ ಜೊತೆಗೆ ಜೈಲುಹಕ್ಕಿಗಳ ಅಕ್ರಮ ಚಟುವಟಿಕೆಗಳಿಗೆ ಒಳಗಿನಿಂದ ಕುಮ್ಮಕ್ಕು ನೀಡುವ ಅಧಿಕಾರಿಗಳ ಬಗ್ಗೆಯೂ ವಿವರ ನೀಡಬೇಕಿತ್ತು. ಆಗ ಸಾರ್ವಜನಿಕರಿಗೂ ಪೊಲೀಸ್ ಅಧಿಕಾರಿಗಳು ತಮ್ಮ ಅಧಿಕಾರವನ್ನು ಹೇಗೆ ದುರುಪಯೋಗ ಪಡಿಸಿಕೊಳ್ಳುತ್ತಿದ್ದಾರೆ ಎಂಬುದರ ಅರಿವಾಗುತ್ತಿತ್ತು. ಅದೇನೇ ಇರಲಿ ಉತ್ತಮ ಮುಖಪುಟ ಲೇಖನಕ್ಕಾಗಿ ಟಿಎಸ್‌ಐಗೆ ಥ್ಯಾಂಕ್ಸ್.

ವಿಘ್ನೇಶ್ ಪ್ರಸಾದ್
ಉಡುಪಿ

ಅಡಕತ್ತರಿಯೊಳಗೆ ಸರ್ಕಾರ

ಒಂದು ಕಡೆ ಹಣದುಬ್ಬರದ ಹೊಡೆತ, ಇನ್ನೊಂದು ಕಡೆ ಅಣು ಒಪ್ಪಂದದ ಕುರಿತಾಗಿ ವಾಮಪಕ್ಷಗಳ ವಿರೋಧ... ಹೀಗೆ ಯುಪಿಎ ಸರ್ಕಾರವೇ ಈಗ ಅಡಕತ್ತರಿಯಲ್ಲಿದೆ. 'ಯುಪಿಎ ಸರ್ಕಾರಕ್ಕೆ ಭರಿಸಲಾಗದ ನಷ್ಟ ತರಲಿದೆ ಹಣದುಬ್ಬರ' ಸಂಪಾದಕೀಯದಲ್ಲಿ ಅರಿಂದಮ್ ಚೌಧುರಿ ಅವರು ವ್ಯಕ್ತಪಡಿಸಿದ ಅಭಿಪ್ರಾಯಗಳು ಚಿಂತನಾರ್ಹ. ಹಣದುಬ್ಬರವನ್ನು ನಿಯಂತ್ರಿಸದೆ, ಸಾರ್ವಜನಿಕ ಬದುಕಿನ ಕುರಿತು ಒಂದಿಷ್ಟೂ ಕಾಳಜಿ ವಹಿಸದೆ ಆಡಳಿತ ನಡೆಸುತ್ತಿರುವ ಯುಪಿಎ ಸರ್ಕಾರದ ನಡೆ ಆಶ್ಚರ್ಯ ಮೂಡಿಸಿದೆ. ಯುಪಿಎಯ ಮಹಾನ್ ಬೌದ್ಧಿಕ ಪ್ರತಿಭೆಗಳು ಸಾರ್ವಜನಿಕರ ಸಂಕಷ್ಟವನ್ನು ಇನ್ನಾದರೂ ಅರಿತು ಪರ್ಯಾಯ ಕ್ರಮ ಕೈಗೊಳ್ಳದಿದ್ದಲ್ಲಿ ಮುಂದಿನ ಚುನಾವಣೆಯಲ್ಲಿ ಅವರು ನೀರು ಕುಡಿಯುವುದು ಗ್ಯಾರಂಟಿ!

ಮಹೇಶ್ ಗೌಡ
ಹುಬ್ಬಳ್ಳಿ

ಉತ್ತರ ನೀಡುವುದು ಯಾರು?

ಜಾಗತಿಕ ಮಟ್ಟದಲ್ಲಿ ಹಣದುಬ್ಬರದಲ್ಲಿ ಸ್ವಲ್ಪ ಏರುಪೇರಾದರೂ ಅದು ಯಾವುದೋ ಹಳ್ಳಿಯ ಮೂಲೆಯಲ್ಲಿರುವ ಬಡ ವ್ಯಕ್ತಿಯ ಮೇಲೆ ಅಷ್ಟೇ ಪ್ರಭಾವ ಬೀರುತ್ತದೆ. ಇನ್ನು ಅಗತ್ಯ ವಸ್ತುಗಳ ಬೆಲೆ ಏರಿಕೆಯಂತೂ ಭಾರತದಂತಹ ಬಡ ಜನರಿರುವ ರಾಷ್ಟ್ರದ ಮೇಲೆ ಎಂತಹ ಪರಿಣಾಮ ಸೃಷ್ಟಿಸಬಹುದು? ಪ್ರಜೆಗಳ ಪ್ರತಿನಿಧಿಯಾದ ಸರ್ಕಾರ ಈ ಸಮಸ್ಯೆಗಳಿಗೆ ಉತ್ತರ ನೀಡಬೇಕು. ಆದರೆ ಈಗಿನ ಪರಿಸ್ಥಿತಿ ಹೇಗಿದೆ ಎಂದರೆ ಚುನಾವಣಾ ಸಂದರ್ಭದಲ್ಲಷ್ಟೇ ಮನೆ-ಮನೆಗೆ ಹೋಗಿ ಮತ ಯಾಚಿಸುವ ರಾಜಕೀಯ ಪುಢಾರಿಗಳು ಸಮಸ್ಯೆ ಎದುರಾದಾಗ ನುಣ್ಣಗೆ ಜಾರಿಕೊಳ್ಳುತ್ತಾರೆ. ಇನ್ನೊಂದೆಡೆ ಕಚ್ಚಾತೈಲ ಬೆಲೆ ಜಾಗತಿಕ ಮಟ್ಟದಲ್ಲಿ ಕೈ ಮೀರಿ ಹೋಗುವಂತೆ ಏರುತ್ತಿದೆ. ಬೆಲೆ ಏರಿಕೆ ಸೂಚನೆ ಕಾಣಿಸಿಕೊಂಡಿದ್ದು ನಿನ್ನೆ ಮೊನ್ನೆಯೇನಲ್ಲ. ಹಾಗಿದ್ದೂ ಯುಪಿಎ ಸರ್ಕಾರ ಸುಮ್ಮನೆ ಕುಳಿತದ್ದು ಏಕೆ ಎಂಬ ಪ್ರಶ್ನೆ ಉದ್ಭವಿಸುತ್ತದೆ. ಏನೇ ಇರಲಿ ಸರ್ಕಾರದ ನಿರ್ಲಕ್ಷ್ಯ ಮನೋಭಾವ ಮಾತ್ರ ಇಲ್ಲಿ ಸ್ಫುಟವಾಗಿ ಕಂಡುಬರುತ್ತಿದೆ. ಮತ್ತೊಂದು ಸರ್ಕಾರ ಅಧಿಕಾರಕ್ಕೆ ಬರುವವರೆಗೆ ತಮ್ಮ ಐದು ವರ್ಷಗಳ ಅಧಿಕಾರವನ್ನು ಯಾವುದೇ ಆತಂಕವಿಲ್ಲದೆ ನೀಗಿಸಿಕೊಳ್ಳುವ ಮನೋಭಾವವೇ ಇದು? ಯುಪಿಎಯ 'ಆಮ್ ಆದ್ಮಿ' ಘೋಷಣೆಯನ್ನು ಅದೇ ಮರೆತು ಬಿಟ್ಟಿದೆಯೇ?

ಕೆ. ಎಚ್. ಅನಿತಾ
ದಾವಣಗೆರೆ

ಭಯೋತ್ಪಾದನೆ ವಿರುದ್ಧ ಸಮರ

ಭಯೋತ್ಪಾದನೆಗೆ ಕಡಿವಾಣ ಹಾಕಬೇಕಾದರೆ ಅಂತರ್ ರಾಷ್ಟ್ರೀಯ ಸಮುದಾಯದಲ್ಲಿ ಪರಸ್ಪರ ಸಹಕಾರ ಹೆಚ್ಚಬೇಕು. ಪ್ರಜ್ಞಾವಂತ ಸಮಾಜದ ವಿದ್ಯಾವಂತ ಯುವಕ, ಯುವತಿಯರನ್ನು ಭಯೋತ್ಪಾದನಾ ಸಂಘಟನೆಗಳಿಂದ ಹೊರತರುವ ಕಾರ್ಯವಾಗಬೇಕು. ಸಮಾಜದ್ರೋಹಿ ಚಟುವಟಿಕೆಗಳು, ಸಜ್ಜನರನ್ನು ನೆಮ್ಮದಿಯಿಂದ ಬದುಕಲು ಬಿಡದ ಭಯೋತ್ಪಾದನೆ ದೇಶದ ಪ್ರಗತಿಗೆ ಮಾರಕ. ಆದರೆ ಭ್ರಷ್ಟ, ದ್ವೇಷ, ವೈಷಮ್ಯಗಳ ನೆರಳಿನಲ್ಲಿ ಹುಟ್ಟಿಕೊಳ್ಳುವ ಭಯೋತ್ಪಾದನೆ ಈಗ ಜಗತ್ತಿನ ಒಂದು ಭಾಗವಾಗಿ ಹೋಗಿದೆ. ಆದ್ದರಿಂದ ಭಯೋತ್ಪಾದನೆ ನಿಯಂತ್ರಿಸುವ ಕೆಲಸ ಸರ್ಕಾರದ್ದೆ ಆದರೂ ಅದನ್ನು ತಡೆಯುವ ಪ್ರಯತ್ನದಲ್ಲಿ ಸರ್ಕಾರದೊಂದಿಗೆ ಸಾರ್ವಜನಿಕರೂ ನೆರವಾದರೆ ಭಯೋತ್ಪಾದನೆ ಕೊನೆಗೊಳ್ಳಬಹುದು.

ಹನುಮಂತ ವಿಠ್ಠಪ್ಪನವರ
ಗೋಕಾಕ

ನಿರ್ಲಕ್ಷ್ಯದ ಪ್ರತಿರೂಪ

ಪ್ರತಿ ಬಾರಿ ನಾವು ಎಚ್ಚೆತ್ತುಕೊಳ್ಳುವುದು ಏನಾದರೊಂದು ಅವಘಡವಾದಾಗಲೇ. ರಾಜ್ಯದಲ್ಲಿ ನಡೆದ ರೈತರ ಆತ್ಮಹತ್ಯೆಯೂ ಇಂತಹುದ್ದೇ ನಿರ್ಲಕ್ಷ್ಯದ ಪ್ರತಿರೂಪ. ರಾಜಕಾರಣಿಗಳು ಅಸಡ್ಡೆ ಪ್ರವೃತ್ತಿ ಪ್ರದರ್ಶನವನ್ನು ಇನ್ನೂ ನಿಲ್ಲಿಸಿಲ್ಲ ಎಂಬುದಕ್ಕೆ ಈ ಬಾರಿ ನಡೆದ ಘಟನೆಯೇ ನಿದರ್ಶನ. ಹಾಗಿದ್ದಲ್ಲಿ ಅಧಿಕಾರದ ಗದ್ದುಗೆ ಮೇಲೆ ಕುಳಿತು ಇವರು ಮಾಡುತ್ತಿರುವುದಾದರೂ ಏನು? ಒಂದೆಡೆ ಹೆಣ ಉರುಳುತ್ತಿದ್ದರೆ ಈ ರಾಜಕಾರಣಿಗಳು ಎಸಿ ರೂಮಿನಲ್ಲಿ ಕುಳಿತು ಪರಿಹಾರ ಘೋಷಿಸುತ್ತಾರೆ! ಈ ನಿಟ್ಟಿನಲ್ಲಿ 'ಸಾವಿನ ಮನೆಯಲ್ಲೂ ರಾಜಕೀಯ' (ಶಶಿ ಸಂಪಳ್ಳಿ) ಲೇಖನ ಸಕಾಲದಲ್ಲಿ ಅರ್ಥವತ್ತಾಗಿ ಮೂಡಿಬಂದಿದೆ.

ನೀರಜಾ ಮೂರ್ತಿ
ಬೆಂಗಳೂರು

ಕುತೂಹಲ ಹೆಚ್ಚಿಸಿತು

ನನ್ನ ಕೆಲವು ಅಚ್ಚುಮೆಚ್ಚಿನ ಪತ್ರಿಕೆಗಳಲ್ಲಿ ಟಿಎಸ್‌ಐ ಕೂಡ ಒಂದು. ಯಾವುದೇ ಪತ್ರಿಕೆ ಬೆಳಕಿಗೆ ಬರಬೇಕಾದರೆ, ಜನಪ್ರಿಯಗೊಳ್ಳಬೇಕಾದರೆ ಪತ್ರಿಕೆಯು ಓದುಗರ ಮನಸ್ಸನ್ನು ತಟ್ಟುವಂತಿರಬೇಕು. ನಿಮ್ಮ ಪತ್ರಿಕೆ ಇನ್ನಷ್ಟು ಜನರನ್ನು ಆಕರ್ಷಿಸಿ ಜನರ ಮೆಚ್ಚುಗೆ ಪಡೆಯುವಲ್ಲಿ ಯಶಸ್ವಿಯಾಗಲಿ ಎಂದು ಹಾರೈಸುತ್ತೇನೆ. ಇತ್ತೀಚೆಗೆ ಆತ್ಮಹತ್ಯೆ ಮಾಡಿಕೊಂಡ ಉಡುಪಿ ಶಾಸಕರ ಪತ್ನಿ ಪದ್ಮಪ್ರಿಯಾರ ಬಗ್ಗೆ ಮೂಡಿಬಂದ ಲೇಖನ 'ಪದ್ಮಪ್ರಿಯ ಹುಟ್ಟು ಹಾಕಿದ ಪ್ರಶ್ನೆಗಳಿಗೆ ಉತ್ತರ?' (ಕೆ. ರಾಘವ ಶರ್ಮ) ಕುತೂಹಲ ಕೆರಳಿಸುವಂತಿತ್ತು. ಸಾಮಾನ್ಯ ವ್ಯಕ್ತಿಯೊಬ್ಬ ಆತ್ಮಹತ್ಯೆ ಮಾಡಿಕೊಂಡಿದ್ದರೆ ಇಷ್ಟೊಂದು ಪ್ರಶ್ನೆಗಳು ಹುಟ್ಟುತ್ತಲೇ ಇರಲಿಲ್ಲ. ಆದರೆ ಈಕೆ ಸಮಾಜದ ಉನ್ನತ ಸ್ಥಾನದಲ್ಲಿರುವವರ ಪತ್ನಿ. ಇಲ್ಲಿ ಮತ್ತೊಂದು ಖೇದಕರ ವಿಚಾರವೆಂದರೆ ಉನ್ನತ ಸ್ಥಾನದಲ್ಲಿರುವ ವ್ಯಕ್ತಿಯ ಪರಿಸ್ಥಿತಿಯೇ ಹೀಗಾದರೆ ಸಾಮಾನ್ಯರ ಪಾಡೇನು? ಪತಿಯೊಂದಿಗೆ ಸಪ್ತಪದಿ ತುಳಿದು ಇಷ್ಟು ವರ್ಷ ಸಂಸಾರ ನಡೆಸಿದ ಪದ್ಮಪ್ರಿಯಾರಿಗೆ ಆತ್ಮಹತ್ಯೆ ಅನಿವಾರ್ಯವಾಗಿತ್ತೆ? ಹಾಗೆ ಆತ್ಮಹತ್ಯೆ ಮಾಡಿಕೊಳ್ಳಬೇಕೆಂದಿದ್ದರೆ ದೆಹಲಿಗೆ ಹೋಗಿ ಏಕೆ ಮಾಡಿಕೊಂಡರು? ಎಂಬ ಸಂಶಯ ಸಹಜವಾಗಿಯೇ ಹುಟ್ಟುತ್ತದೆ. ಆತ್ಮಹತ್ಯೆ ಪ್ರಕರಣದ ಹಿಂದೆ ಯಾರ ಕೈವಾಡ ಇರಬಹುದೆಂಬುದು ಇನ್ನಷ್ಟು ಕುತೂಹಲ ಮೂಡಿಸಿದೆ.

ಜಿ. ಶ್ರೀಶೈಲ
ಧಾರವಾಡ

ಭಾಷೆಯ ಗಡಿ ಮೀರಬೇಕು

ಕನ್ನಡ ಚಿತ್ರಗಳಿಗೆ ಮಾರುಕಟ್ಟೆ ಕಡಿಮೆ ಆಗುತ್ತಿರುವುದು ಅಕ್ಷರಶಃ ಸತ್ಯ. ಕನ್ನಡ ಚಿತ್ರ ನೋಡುವುದಾದರೂ ಯಾರು ಎಂಬ ಭಾವ ಜನರಲ್ಲಿ ಮೂಡುತ್ತಿದೆ. ಎಲ್ಲೋ ಒಂದು 'ಮುಂಗಾರು ಮಳೆ'ಯಂತಹ ಚಿತ್ರಗಳು ಯಶಸ್ಸು ಕಾಣುತ್ತವೆ. ಅಂದರೆ ಕನ್ನಡದಲ್ಲಿ ಉತ್ತಮ ಚಿತ್ರ ಬರಲು ಸಾಧ್ಯವೇ ಇಲ್ಲ ಎಂಬ ಜನರ ಅಭಿಪ್ರಾಯವೂ ಸುಳ್ಳು ಎಂದಾಯಿತು. ಒಳ್ಳೆಯ ಚಿತ್ರಕ್ಕೆ ಭಾಷೆಯ ಗಡಿ ಮೀರಿ ಪ್ರೇಕ್ಷಕರು ಹುಟ್ಟಿಕೊಳ್ಳುತ್ತಾರೆ ಎಂಬ ಸತ್ಯವನ್ನು ಗಾಂಧಿನಗರಿ ಅರ್ಥೈಸಿಕೊಳ್ಳಬೇಕು. 'ಮೊಂಡು ನಟನ ಖಡಕ್ ಮಾತು' (ಎನ್.ಕೆ. ಸುಪ್ರಭಾ) ಲೇಖನದಲ್ಲಿ ದರ್ಶನ್ 'ಹೊರಗಡೆ ಇರುವ ನಮ್ಮವರೇ ಕನ್ನಡ ಚಿತ್ರ ನೋಡುವುದಿಲ್ಲ' ಎಂಬ ಮಾತುಗಳನ್ನು ಕನ್ನಡ ಚಿತ್ರರಂಗ ವಿಮರ್ಶಿಸಬೇಕು.

ತೇಜಸ್ವಿನಿ ಶಂಕರ್
ಮಂಗಳೂರು

ಅಧಿಕಾರ ವ್ಯಾಮೋಹ

ನಾವು ತಮಿಳುನಾಡಿನ ಕಾಂಚ್‌ಪುರದಲ್ಲಿ ವಾಸವಾಗಿದ್ದು ಇಲ್ಲಿ ಯಾವುದೇ ಕನ್ನಡ ಪತ್ರಿಕೆಗಳು ದೊರೆಯುತ್ತಿಲ್ಲ. ಈ ಸಂದರ್ಭದಲ್ಲಿ ನಮಗೆ ಸಿಕ್ಕಿದ್ದು ಟಿಎಸ್‌ಐ. ಲೇಖನಗಳು ತುಂಬಾ ಚೆನ್ನಾಗಿ ಬರುತ್ತಿದೆ. ಆದರೆ 'ಕಂಬಿ ಹಿಂದಿನ ಕುಖ್ಯಾತರು' ಓದಿ ನಮ್ಮ ರಾಜಕೀಯ ಇಷ್ಟೊಂದು ಕೀಳು ಮಟ್ಟಕ್ಕೆ ಇಳಿದು ಹೋಯಿತಲ್ಲ ಎಂದು ಬೇಸರವಾಯಿತು. ಹಾಗೆಯೇ ಕರ್ನಾಟಕದ ಬಿಜೆಪಿ ಸರ್ಕಾರ ನಾಡಿನ ಏಳಿಗೆಗಾಗಿ ಅಧಿಕಾರಕ್ಕೆ ಬಂದಿದೆಯೋ ಅಥವಾ ಅಧಿಕಾರದ ವ್ಯಾಮೋಹದಿಂದ ಬಂದಿದೆಯೋ ಗೊತ್ತಾಗುತ್ತಿಲ್ಲ. ಮಾಹಿತಿ ಯೋಗ್ಯ ಪತ್ರಿಕೆಯ ಪ್ರಧಾನ ಸಂಪಾದಕ ಅರಿಂದಮ್ ಚೌಧುರಿಯವರಿಗೆ ಧನ್ಯವಾದಗಳು.

ರಾಜು ಕೆ.
ಇ-ಮೇಲ್ ಮೂಲಕ

ಕೃತಜ್ಞತೆಗಳು

'ದ ಸಂಡೆ ಇಂಡಿಯನ್' ಕನ್ನಡ ವೆಬ್ ಆವೃತ್ತಿ ಬರುತ್ತಿರುವುದು ಸಂತಸದ ವಿಚಾರ. ತಾಯ್ನಾಡಿನಿಂದ ದೂರದ ದೇಶದಲ್ಲಿದ್ದರೂ ನಮ್ಮ ಮಾತೃಭಾಷೆಯಲ್ಲೇ ಪತ್ರಿಕೆಯನ್ನು ಓದುತ್ತಿದ್ದೇವೆ. ಟಿಎಸ್‌ಐ ಬಳಗಕ್ಕೆ ಕೃತಜ್ಞತೆಗಳು.

ವಿಲ್‌ಫ್ರೆಡ್ ಫರ್ನಾಂಡಿಸ್
ಇ-ಮೇಲ್ ಮೂಲಕ

ಸಮಗ್ರ ವಾರಪತ್ರಿಕೆ

ಒಂದೆಡೆ ರಾಷ್ಟ್ರೀಯ, ಅಂತರ್ ರಾಷ್ಟ್ರೀಯ ವಿಚಾರಗಳ ಸೊಗಡು. ಮತ್ತೊಂದೆಡೆ ರಾಜ್ಯದ ಆಗುಹೋಗುಗಳ ಪರಿಚಯ. ಜಗತ್ತಿನ ವಿದ್ಯಮಾನಗಳನ್ನು ತಿಳಿದುಕೊಳ್ಳಬೇಕೆಂಬ ಆಸಕ್ತಿ ಉಳ್ಳವನಿಗೆ ಇದಕ್ಕಿಂತ ಹೆಚ್ಚಿನದಿನ್ನೇನು ಬೇಕು? ಸಾಹಿತ್ಯ ಪ್ರಿಯರಿಗೆ ಕಥೆ, ಪುಸ್ತಕ ವಿಮರ್ಶೆಗಳು, ಚಿಂತನಯೋಗ್ಯ ಅಂಕಣಗಳು. ಟಿಎಸ್‌ಐ ಸಮಗ್ರ ಪತ್ರಿಕೆ ಎನ್ನಲಡ್ಡಿಯಿಲ್ಲ.

ಸಾಗರ್

9845*****

ಉತ್ತಮ ವೆಬ್‌ಸೈಟ್

ಉತ್ತಮ ಅಂತರ್ಜಾಲ ತಾಣ ಹಾಗೂ ಜ್ಞಾನ ವೃದ್ಧಿಗೂ ವೆಬ್‌ಸೈಟ್ ಸಂಚಿಕೆ ಯೋಗ್ಯವಾಗಿದೆ.

ಈಶ್ವರ್ ಪ್ರಸಾದ್
ಇ-ಮೇಲ್ ಮೂಲಕ