ಓದಿನ ರುಚಿ

'ದ ಸಂಡೆ ಇಂಡಿಯನ್' ಓದಿನ ರುಚಿ ಹೆಚ್ಚಿಸುತ್ತಿದೆ. ಮೌಲ್ಯಯುತ ಪತ್ರಿಕೆಯನ್ನು ನೀಡುತ್ತಿರುವ ನಿಮ್ಮ ಬಳಗಕ್ಕೆ ಹಾರ್ದಿಕ ಅಭಿನಂದನೆಗಳು. ನಿಮ್ಮ ಪ್ರಯತ್ನ ಹೀಗೆ ಮುಂದುವರಿಯಲಿ.

ಪಿ. ಶೇಷಾದ್ರಿ
ಬೆಂಗಳೂರು

ಭಾರತ ದರ್ಶನ ಅನುಭವ

'ಬೋಗಿಯೊಳಗಿನ ಭಾರತ' ಮುಖಪುಟ ಹೊತ್ತು ಬಂದ ಸಂಚಿಕೆ ಓದುತ್ತಿದ್ದಂತೆ ಭಾರತದ ವ್ಯಾಪಕ ರೈಲು ಸಾಮ್ರಾಜ್ಯದ ಒಳ ಹೊಕ್ಕು ಹೊರ ಬಂದಂತಹ ಹಾಗೂ ಕುಳಿತಲ್ಲಿಯೇ ಸಂಪೂರ್ಣ ಭಾರತದ ದರ್ಶನ ಮಾಡಿದಂತಹ ಅನುಭವವಾಯಿತು. ಆದರೆ ನಮ್ಮ ದೇಶದಲ್ಲಿ ಇನ್ನೂ ರೈಲಿನ ಮುಖವನ್ನೇ ನೋಡದಂತಹ ಅದೆಷ್ಟೋ ಹಳ್ಳಿಗಳಿವೆ. ಲಾಲೂ ಪ್ರಸಾದ್ ಯಾದವರು ಪ್ರತಿ ಬಾರಿ ಬಜೆಟ್‌ನಲ್ಲೂ ಕೇವಲ ಬಿಹಾರಕ್ಕೆ ಮಾತ್ರ ರೈಲು ಬಿಡದೆ, ರೈಲನ್ನೇ ನೋಡದ ಹಳ್ಳಿಗಳಿಗೂ ರೈಲು ಒದಗಿಸುವ ಕೃಪೆ ತೋರಬೇಕಾಗಿದೆ. ಮತ್ತಷ್ಟು ಹೊಸ ರೈಲು ಹಾಗೂ ರೈಲು ಮಾರ್ಗಗಳ ಮೂಲಕ ರೈಲು ಸಾಮ್ರಾಜ್ಯವನ್ನು ಇನ್ನೂ ವಿಸ್ತರಿಸಬೇಕು. ಇದೇ ಸಂಚಿಕೆಯಲ್ಲಿ ಮೂಡಿ ಬಂದ 'ಸ್ವತಂತ್ರ ಭಾರತದ ಇತಿಹಾಸದಲ್ಲೇ ಅತಿ ಅಮಾನವೀಯ ಬಜೆಟ್ ಇದು' (ಅರಿಂದಮ್ ಚೌಧುರಿ) ಸಂಪಾದಕೀಯವೂ ಮನ ಸೆಳೆಯಿತು. ಸಾರ್ವಜನಿಕರಿಂದ ಸಂಗ್ರಹವಾದ ತೆರಿಗೆ ಹಣದಿಂದ ಮಂಡಿಸಲಾಗುವ ಬಜೆಟ್ ಯುಪಿಎ ಸರ್ಕಾರದ ಸ್ವಂತ ಆಸ್ತಿಯಂತಾಗಿದೆ. ಮನೆಯಿಂದ ಹಣ ತಂದು ವಿವಿಧ ವಲಯಗಳಿಗೆ ಭಿಕ್ಷೆ ನೀಡಿದಂತೆ ಅಮಾನವೀಯ ರೀತಿಯಲ್ಲಿ ಹಂಚುವ ಚಿದಂಬರಂ ಬಜೆಟ್ ಅನ್ನು ಎಡಪಕ್ಷಗಳು ಬಾಯಿ ಮುಚ್ಚಿಕೊಂಡು ಒಪ್ಪಿಕೊಂಡಿದ್ದು ತೀರಾ ದುರ್ದೈವ. "ರೈತರ 60 ಸಾವಿರ ಕೋಸಾಲ ಮನ್ನಾ" ಎಂಬ ಪಂಗನಾಮವನ್ನು ರೈತರು ಸ್ವತಃ ಅರಿತು ಕೊಳ್ಳಬೇಕಿದೆ. ಕರ್ನಾಟಕದ ಕಾಲು ಭಾಗ ರೈತರು ಕೂಡ ಈ ಸೌಲಭ್ಯವನ್ನು ಪಡೆಯುವುದಿಲ್ಲ ಎಂಬುವುದು ನಗ್ನ ಸತ್ಯ. ದಲ್ಲಾಳಿ ವ್ಯಾಪಾರಸ್ಥರಿಂದ ಬೀಜಕ್ಕಾಗಿ, ಗೊಬ್ಬರಕ್ಕಾಗಿ ಸಾಲ ಮಾಡಿದ ರೈತರು ನೇರವಾಗಿ ತಾವು ಬೆಳೆದ ಬೆಳೆಯನ್ನು ಎಪಿಎಂಸಿಗೆ ಹಾಕಿ ಬರಿಗೈಯಲ್ಲಿ ನಿರಾಸೆಯಿಂದ ಬರುವುದು ಚಿದಂಬರಂ ಅವರಿಗೆ ತಿಳಿದಿಲ್ಲವೇ? ಬ್ಯಾಂಕುಗಳ ಸಾಲವನ್ನು ಮನ್ನಾ ಮಾಡುವ ನಾಟಕ ಸಾಕು. ರೈತರನ್ನು ದಲ್ಲಾಳಿಗಳ ಕಪಿಮುಷ್ಟಿಯಿಂದ ಬಿಡಿಸುವ ಪ್ರಾಮಾಣಿಕ ಪ್ರಯತ್ನ ಮಾಡದ ಚಿದಂಬರಂ ಅವರ ಬಜೆಟ್‌ಗೆ ಧಿಕ್ಕಾರ.

ಎಸ್.ಎಲ್.ವಿ. ಅನಿಲ ಕುಮಾರ
ಮುದಗಲ್

ರೈಲ್ವೆ ಇಲಾಖೆ ಚುರುಕಾಗಬೇಕು

'ರೈಲ್ವೆ ವಿಶೇಷ' ಸಂಚಿಕೆಯಲ್ಲಿ ಮೂಡಿಬಂದ 'ಹಳಿಗಳ ಮೇಲೆ ರಾಜಕಾರಣ' (ಶಶಿ ಸಂಪಳ್ಳಿ) ಲೇಖನ ಚೆನ್ನಾಗಿತ್ತು. ಲೇಖನದಲ್ಲಿ ಪಯಣದ ಅನುಭವದ ಜೊತೆಗೆ ಪ್ರಸ್ತುತ ಸ್ಥಿತಿಗತಿಯನ್ನು ಸಮರ್ಪಕವಾಗಿ ವಿಶ್ಲೇಷಿಸಲಾಗಿದೆ. ರಾಜ್ಯ ರಾಜಕಾರಣಕ್ಕೆ ಮರಳಿದ ಕೃಷ್ಣ, ಅವರ ಮೇಲಿಟ್ಟಿರುವ ಭರವಸೆ, ರೈತರ ಅಸಹಾಯಕ ಬದುಕಿನ ಕುರಿತಾದ ಒಳನೋಟ... ಹೀಗೆ ಎಲ್ಲವನ್ನೂ ಆಯಾ ನಗರ, ಹಳ್ಳಿಗರ ಭಾಷೆಯಲ್ಲಿಯೇ ವ್ಯಕ್ತಪಡಿಸಿದ್ದು ಬರವಣಿಗೆಗೆ ಇನ್ನಷ್ಟು ಪುಷ್ಟಿ ನೀಡಿದಂತಿತ್ತು. ನಿಜವಾಗಿಯೂ ಈ ಲೇಖನ ರಾಜ್ಯದ ಸಮಗ್ರ ರಾಜಕೀಯ ಚಿತ್ರಣವನ್ನು ನೀಡಿದೆ. 'ರೈಲ್ವೆ ವಿಶೇಷ' ಕೇವಲ ರೈಲು ಪ್ರಯಾಣದ ಅನುಭವ ಮಾತ್ರವಲ್ಲ, ಇಡೀ ದೇಶದಾದ್ಯಂತ ಇರುವ ರೈಲು ನಿಲ್ದಾಣಗಳ ಸ್ಥಿತಿ- ಗತಿಗಳನ್ನು ಕೂಡಾ ಅನಾವರಣಗೊಳಿಸಿದೆ. ನಮ್ಮ ರೈಲ್ವೆ ಇಲಾಖೆ ಇನ್ನಷ್ಟು ಚುರುಕಾಬೇಕು. ರೈಲ್ವೆ ಸಚಿವರಾಗಿರುವ ಲಾಲೂ ಪ್ರಸಾದ್ ಯಾದವ್ ಕೇವಲ ಬಿಹಾರವನ್ನು ಮಾತ್ರ ಗಮನದಲ್ಲಿಟ್ಟುಕೊಳ್ಳದೆ ಇಡೀ ದೇಶದುದ್ದಕ್ಕೂ ಗಮನಹರಿಸಬೇಕಿದೆ.

ಎನ್. ಮುತ್ತುರಾಜು
ತುಮಕೂರು

ಪ್ರಗತಿಗೆ ಮಾರಕ

ಟಿಎಸ್‌ಐನ ರೈಲ್ವೆ ವಿಶೇಷ ಸಂಚಿಕೆಯಲ್ಲಿ, ಬೋಗಿಯೊಳಗಿನ ಕಿಟಕಿಯಿಂದ ಸಮಗ್ರ ಭಾರತ ದರ್ಶನ ಮಾಡಿಸಿದ್ದಲ್ಲದೆ, ರೈಲ್ವೆ ಸಚಿವ ಲಾಲೂ ಅವರ ಸಂದರ್ಶನವನ್ನು ಪ್ರಕಟಿಸಿದ್ದು ಸಕಾಲಿಕ. ಇದಕ್ಕಾಗಿ ಟಿಎಎಸ್‌ಐಗೆ ಆಭಾರಿ. ಆದರೆ ಈ ಬಾರಿಯ ರೈಲ್ವೆ ಬಜೆಟ್ ನಿಜವಾಗಿಯೂ ಬೇಸರ ಮೂಡಿಸಿದೆ. ಜನ ಹಿತದ ನೆಪದಲ್ಲಿ ದೇಶದ ರೈಲ್ವೆ ಜಾಲದ ಅಭಿವೃದ್ಧಿಗೆ ಭಾರೀ ಹೊಡೆತ ಬಿದ್ದಿದೆ ಎಂದೇ ಹೇಳಬಹುದು. ರೈಲ್ವೆ ಸಚಿವರ ತರ್ಕಸಮ್ಮತವಲ್ಲದ ರಿಯಾಯಿತಿಗಳು ಮೇಲ್ನೊಟಕ್ಕೆ ಆಕರ್ಷಕವಾಗಿ ಕಂಡರೂ ಪ್ರಗತಿಗೆ ಮಾರಕ. ನಾವು ನಿಜವಾಗಿಯೂ ಪ್ರಗತಿ ಪಥದತ್ತ ಸಾಗಲು ಹಿಂದೇಟು ಹಾಕುತ್ತಿದ್ದೇವೆ ಎಂಬ ಮಾತಿಗೆ ಪ್ರಸ್ತುತ 'ಲಾಲೂ ಬಜೆಟ್' ಸಾಕ್ಷಿ. ಕನ್ನಡಿಗರಿಗೆ ರೈಲ್ವೆ ಇಲಾಖೆಯಲ್ಲಿ ಕೆಲಸವಿಲ್ಲ, ಕರ್ನಾಟಕಕ್ಕೆ ಹೊಸ ರೈಲು ಮಾರ್ಗಗಳಿಲ್ಲ, ಇದ್ದ ಮಾರ್ಗಗಳು ಮುಂದುವರಿಯುವ ಲಕ್ಷಣಗಳಿಲ್ಲ, ಅವರು ಸೃಷ್ಟಿಸಿದ ವಿವಿಧ ಕಲ್ಪನೆಗಳು, 'ಗರೀಬ್‌ರಥ' ಕೇವಲ ಪ್ರಚಾರದ ಮಾದರಿಗಳೇ ಹೊರತು ಫಲ ಕೊಡುತ್ತಿಲ್ಲ. ಮುಖ್ಯವಾಗಿ 'ರೈಲು ಅಂದರೆ ಲಾಲೂ, ಲಾಲೂ ಅಂದರೆ ರೈಲು' ಎನ್ನುವಂತಾಗಿದೆ. ಲಾಲೂ ಅವರು ಬರೀ 'ರೈಲು' ಬಿಡುತ್ತಿದ್ದಾರೆ ಎನ್ನುವುದು ಶ್ರುತ ಪಟ್ಟಿದೆ.

ಬಿ. ರಾಮರಾವ್
ಗುಲ್ಬರ್ಗಾ

ಮನಸ್ಪರ್ಶಿ ಛಾಯಾಚಿತ್ರ

ಕಳೆದ ಸಂಚಿಕೆಯಲ್ಲಿ ಮೂಡಿಬಂದ 'ಬೋಗಿಯೊಳಗಿನ ಭಾರತ' ಭಾರತದ ರೈಲ್ವೆಯ ಸಮಗ್ರ ಚಿತ್ರಣವನ್ನು ನೀಡಿದೆ. ಇಷ್ಟು ದೀರ್ಘ ಮಾಹಿತಿಯನ್ನು ಯಾವ ಪತ್ರಿಕೆಯೂ ನೀಡಿರಲಿಲ್ಲ, ಓದಿ ಬಹಳಷ್ಟು ಆನಂದವಾಯಿತು. ಪತ್ರಿಕೆಯ ಮುದ್ರಣ ಗುಣಮಟ್ಟದಿಂದ ಹಿಡಿದು, ಅದರೊಳಗಿರುವ ವಸ್ತು- ವಿಷಯ ಎಲ್ಲವೂ ಅದ್ಭುತ. ಉತ್ಕೃಷ್ಟ ಗುಣಮಟ್ಟದ ಪತ್ರಿಕೆ ಕೇವಲ ಹತ್ತು ರೂಪಾಯಿಗೆ ದೊರೆಯುತ್ತಿದೆಯಲ್ಲಾ? ಎಂದು ಅಚ್ಚರಿಗೊಂಡೆ. ಉತ್ತಮ ಛಾಯಚಿತ್ರಗಳು ಮನಸ್ಪರ್ಶಿಸುತ್ತವೆ. ಕರ್ನಾಟದ ಎಲ್ಲಾ ಪತ್ರಿಕೆಗಳಿಂದ ಟಿಎಸ್‌ಐ ವಿಭಿನ್ನ. ಇನ್ನಷ್ಟು ಉತ್ತಮ ಲೇಖನಗಳು ಬರಲಿ ಎಂಬುದೇ ನನ್ನ ಆಶಯ.

ಬಿ. ಅರ್ಜುನ್‌ರಾವ್
ಗುಲ್ಬರ್ಗಾ

ಹಸಿದವನ ಹೊಟ್ಟೆಗೆ ಅನ್ನ

ಕಳೆದ ಸಂಚಿಕೆಯಲ್ಲಿ ತೆರೆಬೀಳುವ ಮುನ್ನ ಅಂಕಣದಲ್ಲಿ ಮೂಡಿಬಂದ "ಭಯೋತ್ಪಾದನೆ ಇಸ್ಲಾಂ ವಿರೋಧಿ" (ಫಿರೋಜ್ ಬಖ್ತ್ ಅಹ್ಮದ್) ಲೇಖನದಲ್ಲಿ ಮುಸ್ಲಿಂ ಸಂಘಟನೆ ಮತ್ತು ಮುಖಂಡರ ಕೆಲವೊಂದು ಕೊರತೆಗಳನ್ನು ಎತ್ತಿಹಿಡಿಯುತ್ತಾ, ಭಯೋತ್ಪಾದಕರೆಲ್ಲ ಮುಸ್ಲಿಮರು ಎಂಬ ತಪ್ಪು ಕಲ್ಪನೆ ವ್ಯಾಪಕವಾಗಿ ಹರಡದೆ ಇರಲು ಮುಖಂಡರು ಮೊದಲೇ ಪ್ರಯತ್ನಿಸಬೇಕಿತ್ತೆಂದು ವಾದಿಸಲಾಗಿತ್ತು. ಭಯೋತ್ಪಾದಕರೆಲ್ಲರೂ ಮುಸ್ಲಿಮರೆನ್ನುವುದು ಸುಳ್ಳು. ಆದರೆ ಇದನ್ನು ಕಪೋಲ ಕಲ್ಪಿತವಾಗಿ ಪ್ರಚುರಪಡಿಸಲಾಗುತ್ತದೆ. ಮುಸ್ಲಿಂ ಸಮಾಜದಲ್ಲಿ ಪ್ರಬುದ್ಧ ಪ್ರತಿಭೆಗಳಿದ್ದರೂ ಶಿಕ್ಷಣದ ಕೊರತೆಯಿಂದ ಎಲೆಮರೆಯಲ್ಲಿ ಉಳಿಯಬೇಕಾಗಿದೆ. ಶಿಕ್ಷಣ ಪಡೆಯಬೇಕೆಂದು ಹೇಳುತ್ತಾರೆ. ಆದರೆ ಇದಕ್ಕೆ ಸಹಕರಿಸುವವರು ತೀರಾ ಕಡಿಮೆ. ಇಸ್ಲಾಂ ಧರ್ಮ ಭಯೋತ್ಪಾದನೆಯನ್ನು ವಿರೋಧಿಸುತ್ತದೆ. ಆದರೂ ಕೆಲವು ಮುಸ್ಲಿಂ ನಾಯಕರು 'ಭಯೋತ್ಪಾದನೆಯನ್ನು ವಿರೋಧಿಸುವುದಿಲ್ಲ' ಎಂಬ ಸುಳ್ಳು ಹೇಳಿಕೆಯನ್ನು ನೀಡುವುದು ತೀರಾ ಅಪಾಯಕಾರಿ ಮತ್ತು ಖಂಡನೀಯ. ಆದರೂ ದೇಶದ ಎಲ್ಲಾ ರಾಜ್ಯಗಳಲ್ಲಿ ಮುಸ್ಲಿಂ ನಾಯಕರೆಲ್ಲಾ ರಾಜಕೀಯ ದಾಳಗಳಲ್ಲ. ಹಾಗೆಯೇ ಕೇಂದ್ರ ಸರ್ಕಾರ ಹಜ್ ಯಾತ್ರೆಗೆ ನೀಡುವ ಹಣವನ್ನು ಮುಸ್ಲಿಮರ ಶಿಕ್ಷಣಕ್ಕೂ ಪ್ರಾಮಾಣಿಕವಾಗಿ ಜಾರಿಗೊಳಿಸಿದರೆ ಹಸಿದವನ ಹೊಟ್ಟೆಗೆ ಅನ್ನ ನೀಡಿದಂತಾದೀತು.

ಶಂಶೀರ್ ಬುಡೋಳಿ
ಬಂಟ್ವಾಳ

ಎಲ್ಲವೂ ದೇಶಕ್ಕಾಗಿ!

'ಭಾರತಕ್ಕೆ ಮರಳಿದ ಕಾಶ್ಮೀರ' (ಶಾಹೀದ್ ಹುಸೇನ್) ಲೇಖನ ಓದಿದೆ. ಇಂದಿನ ನಮ್ಮ ಸರ್ಕಾರಗಳು ಚುನಾಚಣಾ ತಂತ್ರವನ್ನು ರೂಪಿಸುತ್ತವೆ. ಚುನಾವಣೆಯಲ್ಲಿ ಗೆದ್ದ ಮೇಲೆ ನಮ್ಮನ್ನು ಗೆಲ್ಲಿಸಿದ್ದು ಯಾರು? ನಾವು ಮಾಡಬೇಕಾದ ಕರ್ತವ್ಯವೇನೆಂಬುದನ್ನು ಮರೆತ ಜನಪ್ರತಿನಿಧಿಗಳು ಸ್ವಾರ್ಥ ಸಾಧನೆಯಲ್ಲಿ ತೊಡಗುತ್ತಾರೆ. ಕಾಲದ ಪರಿವೆ ಇಲ್ಲದೆ ಕುಟುಂಬವನ್ನೇ ಮರೆತು ದೇಶದ ಸೇವೆಯಲ್ಲಿ ನಿರತರಾಗಿರುವ ನಮ್ಮ ಸೈನಿಕರ ಬಗ್ಗೆ ಸರ್ಕಾರಗಳು ತೋರುವ ಕಾಳಜಿ ಅಷ್ಟಕ್ಕಷ್ಟೇ. ನಮ್ಮ ಸರ್ಕಾರ ಪ್ರಯತ್ನಿಸುತ್ತಿದ್ದರೆ ಕಾಶ್ಮೀರ್ ಸಿಂಗ್ 35 ವರ್ಷಗಳನ್ನು ಪಾಕಿಸ್ತಾನದ ಜೈಲಿನಲ್ಲಿ ಕಳೆಯುವ ದುಸ್ಥಿತಿ ಎದುರಾಗುತ್ತಿರಲಿಲ್ಲ. ಸಿಂಗ್ ಅವರ ಯೌವನವೆಲ್ಲ ಜೈಲಿನಲ್ಲಿ ಕಳೆದು ಹೋಯಿತು. 35 ವರ್ಷ ಪರದೇಶದ ಜೈಲಿನಲ್ಲಿ ಕಳೆದಿದ್ದು ಕೇವಲ ದೇಶಕ್ಕಾಗಿ! ಇಂಥ ಇನ್ನೆಷ್ಟೋ ಮಂದಿ ಸೈನಿಕರು ಪರದೇಶದ ಜೈಲಿನಲ್ಲಿರಬಹುದು. ನಮ್ಮ ಸರ್ಕಾರ ಈ ನಿಟ್ಟಿನಲ್ಲಿ ಕಾರ್ಯಪ್ರವೃತ್ತವಾಗಬೇಕಿದೆ.

ಜಯಕುಮಾರ್
ಮಂಗಳೂರು

ಚಿಂತನೆಯನ್ನು ಒರೆಗೆ ಹಚ್ಚಿದೆ

ಟಿಎಎಸ್‌ಐ ತುಂಬಾ ಚೆನ್ನಾಗಿ ಮೂಡಿಬರುತ್ತಿದೆ. ಪ್ರಸ್ತುತ ವಿದ್ಯಮಾನಗಳ ಕುರಿತಾದ ಲೇಖನಗಳು ಮತ್ತು ಚಿಂತನೆಯನ್ನು ಒರೆಗೆ ಹಚ್ಚುವ ಅಂಕಣಗಳು ಪ್ರತಿ ಭಾನುವಾರಕ್ಕಾಗಿ ಕುತೂಹಲದಿಂದ ಕಾಯುವಂತೆ ಮಾಡುತ್ತವೆ.

ರಮೇಶ್ ಬಾಬು ಎಸ್.
ಬಳ್ಳಾರಿ

ನೆನಪು ಮರುಕಳಿಸಿತು

ನಾನು ಟಿಎಸ್‌ಐಯ ನಿರಂತರ ಓದುಗ. ಕಳೆದ ವಾರ ಚೆನ್ನೈಯಿಂದ ಈರೋಡ್‌ಗೆ ಇಂಟರ್‌ಸಿಎಕ್ಸ್‌ಪ್ರೆಸ್‌ನಲ್ಲಿ ಪ್ರಯಾಣಿಸುತ್ತಿದ್ದಾಗ ರೈಲ್ವೆ ವಿಶೇಷ ಸಂಚಿಕೆ ಸಂಪೂರ್ಣವಾಗಿ ಓದಿದ್ದೆ. ನಾನು ಇಡೀ ದೇಶವನ್ನು ರೈಲಿನಲ್ಲಿ ಪ್ರಯಾಣಿಸುವವನು. ಕೊಂಕಣ ರೈಲ್ವೆ ಕುರಿತಾಗಿ ಮೂಡಿಬಂದ ಲೇಖನ ಮತ್ತೆ ಹಳೆಯ ನೆನಪುಗಳನ್ನು ಕೆದಕಿತು.

99650*****

ಮುಂದುವರಿದ ದಂಧೆ

'ಪ್ರಪಾತಕ್ಕೆ ಬಿದ್ದವರ ಆಶಾಕಿರಣ ಎಚ್‌ಐವಿ ಮಸೂದೆ ಅಂಗೀಕಾರ' ಸಂಪಾದಕೀಯದಿಂದ ಏಡ್ಸ್ ರೋಗಿಗಳ ಕಂಗಳಲ್ಲಿ ಒಂದಿಷ್ಟು ಬೆಳಕು ಮೂಡುವಂತಾಗಿದೆ. ಗುಜರಾತ್ ರಾಜ್ಯದಲ್ಲಿ ಏಡ್ಸ್ ನಿಧಿ ಸಂಗ್ರಹದಲ್ಲಿ ಮೋಸ ಆಗಿರುವಂತೆಯೇ ಇತರ ರಾಜ್ಯಗಳಲ್ಲಿಯೂ ಈ ಭ್ರಷ್ಟಾಚಾರ ಮುಂದುವರೆದಿದೆ.

94267******

ಕೈಗನ್ನಡಿ

'ಸ್ವತಂತ್ರ ಭಾರತದ ಇತಿಹಾಸದಲ್ಲೇ ಅತಿ ಅಮಾನವೀಯ ಬಜೆಟ್ ಇದು' ಸಂಪಾದಕೀಯ ನೈಜತೆಗೆ ಹಿಡಿದ ಕೈಗನ್ನಡಿ. 2008-09ನೇ ಸಾಲಿನ ಬಜೆಟ್ ಅನ್ನು ವಸ್ತುನಿಷ್ಠವಾಗಿ ವಿಶ್ಲೇಷಿಸಲಾಗಿದೆ.

93886*****