ಇತ್ತೀಚಿನ ದಿನಗಳಲ್ಲಿ ಯುವರಾಜ್ ಸಿಂಗ್ ಯಾಕೋ ಬಹಳ ಬ್ಯುಸಿಯಾಗಿರೋ ಹಾಗಿದೆಯಲ್ಲ. ಕಾರಣ?

ಕ್ರಿಕೆಟ್! ಮತ್ತಿನ್ನೇನು?

ನಿಮ್ಮ ಬಿರುಸಿನ ಹೊಡೆತಗಳು ಮಾಯವಾದಂತಿದೆ. ಆಸ್ಟ್ರೇಲಿಯದ ಪರಿಸ್ಥಿತಿಗೆ ನೀವು ಹೊಂದಿಕೊಂಡಿಲ್ಲವೇ?

ಇಲ್ಲಿನ ಪರಿಸ್ಥಿತಿ ಬಗ್ಗೆ ದೂರುವಂತಿಲ್ಲ. ಎದುರಾಳಿ ತಂಡದ ಬೌಲಿಂಗನ್ನು ದಂಡಿಸುವಲ್ಲಿ ವಿಫಲನಾಗುತ್ತಿದ್ದೇನೆ ಅಷ್ಟೆ.

ಯುವರಾಜ್ ಸಿಂಗ್ ಒಬ್ಬ ಆಕ್ರಮಣಕಾರಿ ಆಟಗಾರ ಹಾಗೂ ಅತ್ಯುತ್ತಮ ಕ್ಷೇತ್ರರಕ್ಷಕ. ಈ ಕೌಶಲ್ಯಗಳನ್ನು ಹೊಂದುವಲ್ಲಿ ಹೇಗೆ ಸಫಲರಾದಿರಿ? ಇಂದಿನ ಸ್ಪರ್ಧಾತ್ಮಕ ಕ್ರಿಕೆಟ್ ಲೋಕದಲ್ಲಿ ಯಶಸ್ಸು ಕಾಣಲು ಯುವ ಕ್ರಿಕೆಟರ್ ಹೇಗೆ ಸಜ್ಜಾಗಬೇಕೆಂದು ನೀವು ಹೇಳುತ್ತೀರಿ?

ನನ್ನ ಕೌಶಲ್ಯಗಳ ಬಗ್ಗೆ ಹೇಳುವುದಾದರೆ ಅವುಗಳನ್ನು ನಾನು ಸ್ವಾಭಾವಿಕವಾಗಿಯೇ ಮೈಗೂಡಿಸಿಕೊಂಡದ್ದು. ಯಾರೇ ಆಗಲಿ ಕೌಶಲ್ಯಗಳನ್ನು ಸಾಧಿಸಬೇಕೆಂದರೆ ಸೂಕ್ತ ರೀತಿಯಲ್ಲಿ ಅಭ್ಯಾಸ ನಡೆಸುವುದು ಅಗತ್ಯ. ಇನ್ನು ಕೆಲವು ಆಟಗಾರರಲ್ಲಿ ಕ್ರೀಡಾ ಕೌಶಲ್ಯಗಳು ಸ್ವಾಭಾವಿಕವಾಗಿಯೇ ಮೊಳಕೆಯೊಡೆಯುತ್ತವೆ ಮತ್ತು ಅವುಗಳನ್ನು ಸಣ್ಣ ವಯಸ್ಸಿನಲ್ಲೇ ಮೈಗೂಡಿಸಿಕೊಂಡಿರುತ್ತಾರೆ. ಹಾಗಾಗಿಯೇ ಅಂತಹ ಆಟಗಾರರು ಇತರರಿಗಿಂತ ಭಿನ್ನರಾಗಿ ಕಾಣುತ್ತಾರೆ.

ಟೆಸ್ಟ್ ಕ್ರಿಕೆಟ್‌ನಲ್ಲಿ ಒಂದೆಡೆ ಯಶಸ್ಸು ಕಂಡಿದ್ದರೆ ಇನ್ನೊಂದೆಡೆ ವಿಫಲರೂ ಆಗಿದ್ದೀರಿ. ಬ್ಯಾಟಿಂಗ್ ಸ್ಥಿರತೆ ಕಾಯ್ದುಕೊಳ್ಳುವಲ್ಲಿ ಎಡವುತ್ತಿರುವುದಕ್ಕೆ ಕಾರಣ?

ಸದ್ಯ ನಾನು ಆ ಕುರಿತು ಯೋಚಿಸುವುದನ್ನೇ ನಿಲ್ಲಿಸಿದ್ದೇನೆ. ವೈಫಲ್ಯದ ಕುರಿತೇ ಸದಾ ಯೋಚಿಸುತ್ತಿದ್ದರೆ ನನ್ನ ಮೇಲೆ ನಾನೇ ಒತ್ತಡ ಹಾಕಿಕೊಂಡಂತಾಗುತ್ತದೆ. ಏನು ನಡೆಯಬೇಕೋ ಅದು ನಡೆದೇ ತೀರುತ್ತದೆ. ಯಾರೂ ಅದನ್ನು ತಡೆಯುವಂತಿಲ್ಲ. ಆದರೆ ಯಶಸ್ಸಿಗಾಗಿ ನನ್ನ ಹೋರಾಟವನ್ನು ಎಂದೂ ನಿಲ್ಲಿಸುವುದಿಲ್ಲ.

ಇಂಗ್ಲೆಂಡ್ ಹಾಗೂ ಟ್ವೆಂಟಿ-20 ವಿಶ್ವಕಪ್ ಸಂದರ್ಭದಲ್ಲಿ ನಿಮ್ಮ ಬ್ಯಾಟಿಂಗ್ ಫಾರ್ಮ್ ಅತ್ಯುತ್ತಮವಾಗಿತ್ತು. ಟ್ವೆಂಟಿ-20 ವಿಶ್ವಕಪ್‌ನ ಅನುಭವ ಹೇಗಿತ್ತು? 6 ಎಸೆತಗಳಲ್ಲಿ ಭರ್ಜರಿ 6 ಸಿಕ್ಸರ್ ಬಾರಿಸಿದಾಗ ಏನನ್ನಿಸಿತು?

ಓಹ್! ಅದೊಂದು ಅದ್ಭುತ ಅನುಭವ... ಒತ್ತಡಗಳಿಲ್ಲದೆ ಬ್ಯಾಟ್ ಮಾಡಿದಾಗ ನಾನು ನಿಜವಾಗಿಯೂ ಉಲ್ಲಸಿತನಾಗಿದ್ದೆ. 6 ಸಿಕ್ಸರ್ ಹೊಡೆದದ್ದು ವಿಶೇಷ ಖುಷಿ ತಂದರೂ ಟೂರ್ನಿಯ ಸೆಮಿಫೈನಲ್ ಪಂದ್ಯದಲ್ಲಿ ಆಸ್ಟ್ರೇಲಿಯ ವಿರುದ್ಧದ ಅರ್ಧ ಶತಕ ಮರೆಯಲಾಗದ್ದು.

ನೀವು ಬಾಲಿವುಡ್‌ನಿಂದ ಆಕರ್ಷಿತರಾದಂತೆ ಕಾಣುತ್ತೀರಿ. ನಿಮ್ಮ ನೆಚ್ಚಿನ ಚಿತ್ರ ಹಾಗೂ ಕಲಾವಿದರು ಯಾರು? ಯುವರಾಜ್ ಬೆಳ್ಳಿತರೆಗೆ ಕಾಲಿಡಲಿದ್ದಾರೆಯೇ?

ಇಲ್ಲ. ಬಾಲಿವುಡ್ ಬಗ್ಗೆ ನಾನು ಹೆಚ್ಚು ಯೋಚಿಸಿಲ್ಲ. ಆದರೆ ಹಿಂದಿ ಚಿತ್ರಗಳು ನನಗೆ ಅಚ್ಚುಮೆಚ್ಚಿನವು ಎಂಬುದರಲ್ಲಿ ಅನುಮಾನವೇ ಇಲ್ಲ. ಕ್ರಿಕೆಟ್ ಬಗ್ಗೆ ಸದಾ ಚಿಂತಿಸುತ್ತಿರುತ್ತೇನೆಯೇ ಹೊರತು ಬಾಲಿವುಡ್ ಕಡೆ ಗಮನಹರಿಸಿಲ್ಲ.

ಕ್ರಿಕೆಟ್‌ನಲ್ಲಿ ನೀವೊಬ್ಬ ಅರೆಕಾಲಿಕ ಬೌಲರ್. ಆದರೆ ಬೆಂಗಳೂರಿನಲ್ಲಿ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಬೌಲಿಂಗ್ ಮೂಲಕ ಪಾಕ್ ಬ್ಯಾಟಿಂಗ್ ಪಡೆಗೆ ಬಿಸಿ ಮುಟ್ಟಿಸಿದ್ದಿರಿ. ಬೌಲಿಂಗ್ ನಡೆಸುವಾಗ ಮನದಲ್ಲಿ ಏನನ್ನು ಯೋಚಿಸುತ್ತಿರುತ್ತೀರಿ?

ನನ್ನ ಬೌಲಿಂಗ್ ಕುರಿತಾಗಿ ನಾನು ಹೆಚ್ಚು ಯೋಚಿಸಲು ಹೋಗಿಲ್ಲ. ಬೌಲಿಂಗ್ ಮಾಡುತ್ತೇನೆ ಅಷ್ಟೆ.

ಪ್ರಸ್ತುತ ಭಾರತ ಕ್ರಿಕೆಟ್ ತಂಡದಲ್ಲಿ ಹಲವಾರು ಉತ್ಸಾಹಿ ಯುವ ಆಟಗಾರರಿದ್ದಾರೆ. ಭಾರತ ತಂಡದ ಭವಿಷ್ಯದ ಯೋಜನೆಗಳ ಕುರಿತು ನೀವೇನು ಹೇಳುತ್ತೀರಿ? ಮುಂದಿನ 5 ವರ್ಷಗಳವರೆಗೆ ತಂಡ ನಿರಂತರ ಸ್ಥಿರತೆ ಕಾಯ್ದುಕೊಳ್ಳಲು ಮತ್ತು ಯಶಸ್ಸು ಸಾಧಿಸಲು ಏನು ಮಾಡಬೇಕು?

ಯುವ ಆಟಗಾರರಿಗೆ ಸೂಕ್ತ ತರಬೇತಿ ನೀಡುವುದು ಹಾಗೂ ಅವರಲ್ಲಿ ಸಾಕಷ್ಟು ಆತ್ಮವಿಶ್ವಾಸ ಬೆಳೆಯುವಂತೆ ಮಾಡಬೇಕು. ಉತ್ತಮ ಯುವ ಬೌಲರ್‌ಗಳು ಹಾಗೂ ಅದ್ಭುತ ಕ್ಷೇತ್ರರಕ್ಷಕರ ಪಡೆಯೇ ನಮ್ಮಲ್ಲಿದೆ. ಹಾಗಾಗಿ ಈಗಿನಿಂದಲೇ ಹೆಚ್ಚಿನ ಅಭ್ಯಾಸ ನಡೆಸಿದಲ್ಲಿ ಮುಂಬರುವ ವಿಶ್ವಕಪ್‌ಗೆ ಭಾರತ ತಂಡ ಸಕಲ ರೀತಿಯಲ್ಲಿ ಸಜ್ಜಾಗುವಲ್ಲಿ ಸಂಶಯವೇ ಇಲ್ಲ.

ಇತ್ತೀಚೆಗೆ ಹುಟ್ಟಿಕೊಂಡಿರುವ ಬಿಸಿಸಿಐ ಪ್ರಾಯೋಜಿತ 'ಇಂಡಿಯನ್ ಪ್ರೀಮಿಯರ್ ಲೀಗ್' (ಐಪಿಎಲ್) ಮೇಲೆ ಅಪಾರ ನಿರೀಕ್ಷೆ ಇಟ್ಟುಕೊಳ್ಳಲಾಗಿದೆ. ಐಪಿಎಲ್ ಆಟಗಾರನಾಗಬೇಕೆಂಬ ಆಕಾಂಕ್ಷೆ ನಿಮಗಿದೆಯೇ? ಹಾಗಿದ್ದಲ್ಲಿ ಐಪಿಎಲ್‌ನಿಂದ ನೀವೇನನ್ನು ನಿರೀಕ್ಷಿಸುತ್ತೀರಿ ಮತ್ತು ಅದು ಎಷ್ಟರ ಮಟ್ಟಿಗೆ ಯಶಸ್ಸು ಕಾಣಲಿದೆ?

ಹೌದು, ಐಪಿಎಲ್ ನಿಜವಾಗಿಯೂ ಉತ್ಸಾಹಿ ಕ್ರಿಕೆಟ್ ಸಂಸ್ಥೆ. ಅಂತರ್ ರಾಷ್ಟ್ರೀಯ ಕ್ರಿಕೆಟ್ ಆಟಗಾರರೊಂದಿಗೆ ಆಡಲು ಇಲ್ಲಿ ಅವಕಾಶ ದೊರಕುವುದರಿಂದ ಕ್ರಿಕೆಟ್‌ನಲ್ಲಿ ನಾವು ಹೆಚ್ಚಿನದನ್ನು ಕಲಿಯಲು ಸಾಧ್ಯ. ಹಾಗೇ ಪ್ರಥಮ ದರ್ಜೆ ಹಾಗೂ 21ರ ವಯೋಮಿತಿ ಒಳಗಿನ ಆಟಗಾರರಿಗೆ ಅಂತರ್ ರಾಷ್ಟ್ರೀಯ ಆಟಗಾರರೊಂದಿಗೆ ಬೆರೆಯಲು ಉತ್ತಮ ಅವಕಾಶ. ಆದರೆ ನನ್ನ ಪ್ರಕಾರ ಎರಡನೇ ವರ್ಷದಲ್ಲಿ ಐಪಿಎಲ್ ಉತ್ತಮ ಸಂಸ್ಥೆಯಾಗಿ ಹೊರಹೊಮ್ಮಲು ಸಾಧ್ಯ.

 ಟಿಎಸ್‌ಐ